जसपा बैठकबारे थाहा भएन महन्थ ठाकुरलाई

काठमाडौं । जनता समाजवादी पार्टी जसपाभित्रको विवाद चरमोत्कर्षमा पुगेको छ । जसपाका अध्यक्ष उपेन्द्र यादव पक्षले केन्द्रीय कार्यकारिणीको बैठक बोलाएपछि अर्का अध्यक्ष महन्थ ठाकुरले बैठकै नबसेको जनाएका छन् ।

अध्यक्ष ठाकुरले शनिबार एक विज्ञप्ति प्रकाशित गर्दै पार्टी कार्यालयमा कुनै बैठक नबसकेको जिकिर गरेका हुन् । ठाकुरले पार्टीको कुनै आधिकारिक बैठक नबोलाइएको जनाएका छन् ।

ओली सरकारलाई समर्थ गर्ने या विस्थापित गर्ने विषयमा जसपाभित्र केही दियनयता गम्भीर मतभेद उत्पन्न भएको छ । अध्यक्ष उपेन्द्र यादव पक्षले प्रधानमन्त्रीबाट ओलीको विकल्पमा जानुपर्ने भन्दै विपक्षी मोर्चावन्दीमा सामेल भएको छ भने ठाकुर पक्ष ओलीलाई नै सत्तामा टिकाउन संसदमा तटस्थ बस्नेदेखि ओलीको दोस्रो सपथग्रहण समारोहमा आतिथ्यता ग्रहण गरेको छ ।

पार्टीभित्र सत्तारुढ दलको अवान्छित प्रवेशपछि समस्या सुरु भएको यादव पक्षले आरोप लगाइरहेको छ । गत बिहीबार मात्रै प्रधानमन्त्री ओलीका निकट सहयोगी सांसद महेश बस्नेतको पहलमा ठाकुर निकट सांसदहरुलाई भक्तपुर पुर्याएर राजेन्द्र महतोलाई संसदीय दलको नेता चयन गरेको सार्वजनिक गरिएको थियो ।

यादव पक्षले बोलाएको कार्यकारिणिले पार्टीको विधान विपरित संसदीय दलको नेता चयन गर्न नसक्ने जनाउँदै त्यसलाई अस्वीकार गर्ने स्पष्ट पारेको छ । केन्द्रीय कार्यकारिणीमा यादव पक्ष बहुमतमा रहेको छ । तर संसदीय दलमा भने कतिपय सांसदले दुवै तिर हस्ताक्षर गर्दा आआफ्नो दाबी मात्रै प्रस्तुत हुँदै आएको छ ।