पेट्रोलियम पदार्थको मूल्य उच्च दरले बढ्ने निश्चित, भारतले पठायो नयाँ मूल्यसूची
काठमाडौ । नेपालमा पेट्रोलियम पदार्थको मूल्य फेरि बढ्ने निश्चित भएको छ ।
भारतीय आयल कर्पोरेसनले उच्च दरले इन्धनको मूल्य बढाएर नेपाल आयल निगमलाई पठाएसँगै मूल्यवृद्धि हुने निश्चित भएको हो ।
बुधबार भारतबाट प्राप्त मूल्यअनुसार पेट्रोल प्रतिलिटर १६ रुपैयाँ ३७ पैसा, डिजेल २४ रुपैयाँ ४९ पैसा र हवाई इन्धन १८ रुपैयाँ ८९ पैसाले बढेर आएको छ ।
हालको बिक्रिमूल्यअनुसार पेट्रोलको उपभोक्ता मूल्य १५० रुपैयाँ छ । निगमले पेट्रोलमा मात्रै प्रतिलिटर ३२ रुपैयाँ ८१ पैसा घाटा भएको जनाएको छ । यसैगरी डिजल र मट्टितेलको मूल्य १३३ रुपैयाँ, हवाई इन्धनको आन्तरिकतर्फ १३६ रुपैयाँ र बाह्यतर्फ १ दशमलव २९५ डलर प्रति लिटर मूल्य छ ।
यसैगरी अहिले खाना पकाउने ग्याँसको मूल्य १५७५ रुपैयाँ रहेको छ । ग्याँसमा प्रतिसिलिण्डर ६६५ रुपैयाँ ३४ पैसा घाटा रहेको निगमले जनाएको छ । मट्टितेल र हवाई इन्धनमा भने निगम अझै पनि नाफामै रहेको छ ।
यससँगै पाक्षिक नोक्सानी ५ अर्ब ३० करोड पुग्ने निगमले जनाएको छ । जसअनुसार एकमहिनामा निगमलाई १० अर्ब बढीको नोक्सानी पुग्नेछ ।
प्रतिक्रिया