बुटवल । कार्टुनमार्फत भ्रष्टाचार भण्डाफोर अभियान शुरु गरेका कार्टुनिस्टहरुको देशब्यापी कार्टुन फोटो प्रदर्शनी आईतबारबाट बुटवलमा शुरु भएको छ । कार्यक्रमको एक समारोहका बिच लुम्बिनी प्रदेशका सभामुख पुर्ण बहादुर घर्ती मगरले उदघाटन गरे ।
सो अवसरमा बोल्दै हजार शब्दको वर्णन एउटै चित्रबाट हुनु नै कार्टुन कला भएको बताए । पत्रपत्रिकामा आम नागरिकलाई सुसुचित गर्ने एउटा महत्वपूर्ण माध्यममा कार्टुन चित्र भएको उल्लेख गर्दै उनले सांकेतिक भाषामा बिचार प्रकट गर्ने कार्टुन बलियो पक्ष भएको बताए । सबै खाले पाठकलाई आर्कषण गर्ने काम कार्टुन चित्रबाट हुने पनि उनले बताए । उनले समयसापेक्ष वास्तविक कुरालाई उजागर गर्ने भएकाले पनि यो सबैको मनमा बस्ने गरेको दाबी गरे ।
कार्टुनिस्ट क्लब अफ नेपालको आयोजना तथा सेन्टर फर मिडिया रिर्सच नेपालको सहकार्यमा आईतबार बुटवलस्थित होटल स्पानमा निसाना भष्ट्राचार बिरुद्ध दुई दिने कार्टुन फोटो प्रर्दशन गरिएको हो । आयोजक कार्टुनिष्ट क्लब अफ नेपालका अध्यक्ष बासु क्षितिजले आफुहरु मंसिर ४ गते अघि नै देश दौडाहाको प्रर्दशन सक्ने बताए । समाजमा भष्ट्राचारको ग्राफ बढ्ने तर यसलाई रोक्न कसैबाट चासो नदेखिएको भन्दै अभियानका रुपमा कार्यक्रम गरेको उनले जनाए । चुनावी टिकटलाई आधार मान्दै सबै राजनीतिक दलहरु यो प्रदर्शनबाट सहि नेतालाई छनौट होस भन्नुनै आफुहरुको मनसाय भएको उनले बताए ।
छोटोसमयको तयारीबीच प्रदर्शनी आयोजना गरिएको भन्दै उनले छोटो सूचनाबाट धेरै राम्रो प्रचारप्रसार भएको बताए । ‘यो केवल प्रदर्शनीमात्र होईन भष्ट्राचारबिरुद्धको सिर्जनात्मक अभियानको शुरुवात हो ।’–उनले भने ।
प्रदर्शनीमा नेपालका उत्कृष्ट ३६ जना कार्टुनिस्टहरुको कार्टुन फोटो राखिएको छ ।
प्रतिक्रिया