काठमाडौं । इरायलले अमेरिकाको समर्थनमा इरानविरुद्ध सैन्य आक्रमण सुरु गरेको जनाएको छ।
इजरायली पक्षले यसलाई “पूर्वसावधानीका रूपमा गरिएको आक्रमण” भन्दै औपचारिक पुष्टि गरेको छ ।
इजरायलका रक्षा मन्त्री इसरायल कात्सले विज्ञप्ति जारी गर्दै देशभर “विशेष र स्थायी आपतकालीन अवस्था” घोषणा गरेका छन्। सुरक्षा जोखिमलाई मध्यनजर गर्दै सरकारले उच्च सतर्कता अपनाएको बताइएको छ। यो आक्रमणलाई अमेरिकाले समर्थन गरेको छ । अमेरिका र इरानबीच जेनेभामा वार्ता सकिएको केही समयमा इजरायलले आक्रमण गरेको छ ।
इजरायली अधिकारीहरूका अनुसार इरानमाथि आक्रमण गरिएपछि शनिबार इजरायलको हवाई क्षेत्र नागरिक उडानका लागि बन्द गरिएको छ।
सम्भावित प्रतिकार कारबाहीका रूपमा इजरायलतर्फ रकेट आक्रमण हुन सक्ने आँकलन गर्दै सेनाले देशका विभिन्न क्षेत्रमा हवाई हमलाको साइरन बजाएको जनाएको छ। सर्वसाधारणलाई सुरक्षित स्थानमा रहन र सुरक्षासम्बन्धी निर्देशन पालना गर्न आग्रह गरिएको छ।
उता, इरानको सरकारी सञ्चारमाध्यमसँग सम्बद्ध फार्स समाचार एजेन्सीले तेहरानको डाउनटाउन क्षेत्रमा धेरै विस्फोटका आवाज सुनिएको जनाएको छ। एजेन्सीले सो क्षेत्रमा भएका तीन वटा विस्फोटका तस्वीरसमेत सार्वजनिक गरेको छ।
यस घटनापछि पश्चिमएशिया क्षेत्रमा तनाव थप चर्किएको छ र अन्तर्राष्ट्रिय समुदायले परिस्थितिलाई नजिकबाट नियालिरहेको छ।
प्रतिक्रिया