काठमाडौं । प्रधानमन्त्रीले सर्वभौम संसद विघटन गर्न सिफारिस गर्ने प्रस्तावका विपक्षमा रहेका मन्त्रीहरुले सामूहिक राजीनामा दिएका छन् । ओली नेतृत्वका सरकारमा रहेका ७ जना मन्त्रीले काठमाडौमा पत्रकार सम्मेलन गर्दै राजीनामाको घोषणा गरेका हुन् ।
राजीनामा दिने मन्त्रीहरुमा शिक्षा बिज्ञान तथा प्रबिधि मन्त्री गिरिराजमणी पोखरेल, उर्जा जलश्रोत तथा सिंचाई मन्त्री वर्षमान पुन, कृषि तथा पशुपंक्षि विकास मन्त्री घनश्याम भुसाल, संस्कृति पर्यटन तथा नागरिक उड्यान मन्त्री योगेश कुमार भट्टराई, वन तथा वातावरण मन्त्री शक्ति बस्नेत, श्रम तथा रोजगार मन्त्री रामेश्वर राय यादव तथा खानेपानी तथा सरसफाई मन्त्री बिना मगर रहेका छन् ।
उनीहरुले पत्रकार सम्मेलनमा बितरण गरेको बिज्ञप्तिमा प्रधानमन्त्रीबाट भएको अलोकतान्त्रिक र असंवैधानिक कदम रोक्न प्रयत्न गर्दा पनि नसकेको उल्लेख गरेका छन् । जनादेश विपरित तथा राजनीतिक मुल्य र स्थिरताको प्रतिकुल निर्णय आएकाले आफुहरुले मन्त्री पदबाट राजीनामा दिएको बिज्ञप्तिमा उल्लेख छ ।
पत्रकार सम्मेलनमा बोल्दै राजीनामा दिएका मन्त्री घनश्याम भुसालले प्रधानमन्त्रीको कदमले कम्युनिष्ट पार्टी सहित नेपालको बाम आन्दोलनलाई नै सखाप पानै दिशामा अगाडी बढेको बताए ।
पूर्व माओवादी कित्ताबाट मन्त्री बनेका गृह मन्त्री राम बहादुर थापा बादल र बाणिज्य तथा आपुर्ति मन्त्री लेखराज भट्टले भने राजीनामा दिएका छैनन् ।
प्रतिक्रिया