राष्ट्रियताको मुद्दामा सस्तो टिप्पणी नगर्न सरकारलाई काँग्रेसको चेतावनी

काठमाडौं । प्रमुख प्रतिपक्षी दल नेपाली कांग्रेसले सरकारलाई राष्ट्रियताको मुद्दामा मनलाग्दी नगर्न चेतावनी दिएको छ ।

बिहीबार आयोजित पत्रकार सम्मेलनमा काँग्रेस प्रवक्ता विश्वप्रकाश शर्माले सरकारलाई राष्ट्रियताको सवालमा परिपक्व र जिम्मेवार बन्न आग्रह गर्नुभयो ।

शर्माले सीमासम्बन्धी विषयमा सत्तपक्ष राजनीतिक प्रोपोगान्डाको बाटोमा संलग्न भएको आरोप लगाउनुभयो ।

‘कालापानी, लिपुलेक र लिम्पियाधुरालगायतको भूगोल नेपालको भू–भाग हुन् अत: कालापानीबाट भारतीय सैनिक फिर्ता हुनुपर्छ र नेपालको निर्वाध हक ती भू–भागमा कायम हुनुपर्छ भनेर नेपाली कांग्रेसले विगतदेखि नै प्रस्ट धारणा राख्दै आएको छ । ती भू–भागलाई समेटेर सरकारले सार्वजनिक गरेको नक्साका पक्षमा नेपाली कांग्रेस रहेको जानकारी सर्वदलीय बैठक मार्फत दिइसकिएको छ,’ प्रवक्ता शर्माले भन्नुभयो ।

‘एकातर्फ नेपाली कांग्रेसले ‘समय मागेको’ झुटको अभिव्यक्ति र अर्कातर्फ कांग्रेसको अनुरोधमा संशोधन प्रस्तावलाई कार्यसूचीबाट हटाइएको गोयबल्स शैलीको प्रोपोगान्डाप्रति हाम्रो गम्भीर आपत्ति छ,’ शर्माले भन्नुभयो ।

पत्रकार सम्मेलनमा कांग्रेस प्रवक्ता विश्वप्रकाश शर्माले सरकारको कमजोर तयारीका कारण कोरोना संक्रमण तीव्र रुपमा विस्तार भइरहेको आरोप लगाउनुभयो ।