काठमाडौं । नेता भीम रावलका सुरक्षा गार्डलाई कोरोना भाइरसको संक्रमण देखिएपछि नेकपा स्थायी कमिटी बैठक स्थगित गरिएकोछ ।
बुधबार बिहान ११ बजे पार्टी केन्द्रीय कार्यालय धुम्बाराहीमा बस्ने भनिएको बैठक स्थायी कमिटी सदस्य रावलका सुरक्षा गार्डलाई कोरोना संक्रमण भएको थाहा भएपछि स्थगित गरिएको हो ।
बैठक स्थगित गरेको सचिवालयले नेताहरुलाई जानकारी गराइएको छ । नेता रावलले संसदमा कोरोनाको परीक्षण गराएपनि उहाँको सुरक्षामा खटिएका सुरक्षाकर्मीको परीक्षण भएको थिएन ।
तर मंगलबार भक्तपुरमा फेला परेका २७ वर्षीय कोरोना संक्रमित रावलको सुरक्षार्थ खटिएका सशस्त्र प्रहरी रहेको थाहा भएको थियो ।
रावल नेकपा स्थायी कमिटी सदस्य हुनुहुन्छ । स्थायी कमिटी बैठकको माग गर्ने नेतामध्ये रावल पनि एक हुनुहुन्छ ।
अध्यक्ष प्रचण्डको पहलमा बस्न लागेको बैठक स्थागित भएपछि अध्यक्ष एवं केपी शर्मा ओलीलाई भने हाइसञ्चो भएको छ । आफुविरुद्ध आक्रमक ढंगले प्रस्तुत हुनेथाहा पाएपछि ओलीले २५ गते बस्ने भनिएको बैठक स्थगित गराउनुभएको थियो ।
तर, आज बस्ने भनिएको बैठकमा पार्टीको आन्तरिक विवादलाई नउठाउने, भारतले गरेको सीमा अतिक्रमण र सरकारको नीति तथा कार्यक्रम र बजेटबारे मात्र छलफल हुने प्रतिद्धता अध्यक्ष प्रचण्डले जनाएपछि ओली बैठक डाक्न राजी हुनुभएको थियो ।
नेकपाको अर्को बैठकको मिति निश्चित छैन ।
प्रतिक्रिया