कुनै व्यक्तिको पार्टी र राष्ट्र विरोधी गतिविधिले एकीकृत पार्टी संरचना भत्काउन सक्नेछैन : प्रचण्ड

काठमाडौं । नेपाल कम्युनिष्ट पार्टी(नेकपा)का अध्यक्ष प्रचण्डले प्रधानमन्त्री एवं पार्टीका अध्यक्ष केपी शर्मा ओलीलाई अनुशासनको कारबाहीका निम्ती स्पष्टिकरण सोधिएको जानकारी दिएका छन् ।

आज बिहान एक बिज्ञप्ति प्रकाशित गर्दै अध्यक्ष प्रचण्डले पार्टीका अध्यक्ष समेत रहेका प्रधानमन्त्री ओलीले चालेको प्रतिनिधि सभा विघटनको असंवैधानिक, अलोकतान्त्रिक, निरंकुश, पश्चगामी एवम् स्वेच्छाचारी कदम भएको स्पष्ट पारेका छन् ।

प्रचण्डले प्रकाशित बिज्ञप्तिमा आईतबार बसेको स्थायी कमिटीको बैठकले ओलीको कदमको विरोध एवम् भत्र्सना गरेको जनाउँदै पार्टीले ओलीको संसद विघटनको कदमलाई पूर्ण रुपमा अस्वीकार गर्ने र ओलीलाई अनुशासनको कारबाहीका निम्ति स्पष्टिकरण माग्ने निर्णय गरेको उल्लेख गरेका छन् ।

उनले बिज्ञप्तिमा लेखेका छन् – ‘पार्टी एकतावद्ध छ र कुनै व्यक्तिको पार्टी, राष्ट्र र जनता विरोधी यसप्रकारका कार्यले हाम्रो पार्टीको एकतालाई कुनै तात्विक असर पर्ने छैन ।’

प्रचण्डको बिज्ञप्तिमा नेपाली जनताले ठूलो त्याग र बलिदानपूर्ण संघर्षको परिणाम स्वरुप प्राप्त गरेको संघीय लोकतान्त्रिक गणतन्त्र सहितको राजनीतिक परिवर्तनको रक्षा गर्नु आजको ऐतिहासिक कार्यभार भएको उल्लेख गरिएको छ ।

प्रचण्डले राष्ट्रको समृद्धि र नेपाली कम्युनिष्ट आन्दोलनको भविष्यका निम्ति पार्टी एकतालाई कमजोर पार्ने सबै प्रकारका प्रवृति र तत्वहरुका विरुद्ध एकतावद्ध भएर उभिन तथा कुनै व्यक्तिको पार्टी विरोधी गतिविधिले एकीकृत पार्टीको संरचना र पार्टी एकतालाई भत्काउन नसक्ने समेत बिज्ञप्तिमा भनेका छन् । प्रचण्डले कुनै भ्रमात्मक प्रचारमा नपर्न पनि कार्यकर्तालाई आग्रह गरेका छन् ।