काठमाडौं । प्रदेश १ का मुख्यमन्त्री शेरधन राई विरुद्ध प्रचण्ड नेपाल पक्षले राखेको अविश्वासको प्रस्ताव प्रदेश सभामा पेश भएको छ ।
सभामुख प्रदीपकुमार भण्डारीले प्रस्ताव पेश गर्न समय दिएपछि प्रचण्ड नेपाल पक्षका सांसद इन्द्रबहादुर आङ्वोले प्रस्ताव प्रदेश सभा बैठकमा विधिवत रुपमा पेश गरेका छन् । प्रचण्ड नेपाल पक्षीय नेकपाका सांसदहरुले गत पुष १२ गते मुख्यमन्त्री विरुद्ध प्रदेशसभा सचिवालयमा अविश्वासको प्रस्ताव दर्ता गराएका थिए ।
प्रस्तावक आङ्वोले प्रस्ताव पेश गर्दै प्रतिनिधिसभा विघटनको असंवैधानिक कदमलाई मुख्यमन्त्री राईले समर्थन गरेका कारण आफुहरुले उनी विरुद्ध अविश्वासको प्रस्ताव दर्ता गराएको दाबी गरे । राईले अविश्वासको प्रस्ताव फेस गर्नबाट प्रदेश सरकार भागेको पनि आरोप लगाए ।
प्रस्ताव पेश भए लगत्तै सभामुख भण्डारीले फागुन २० गतेसम्मका लागि बैठक स्थगित गरेका छन् ।
मुख्यमन्त्री राई पक्षधरहरुले भने सत्तारुढा पार्टी वैधानिक रुपमा विभाजन नभएका कारण संसदीय दलका नेता मुख्यमन्त्री राईले प्रचण्ड नेपाल निकट १६ जना सांसदहरुलाई गरेको कारवाही सदर गर्नुपर्ने माग गर्दैआएका थिए ।
प्रतिक्रिया