काठमाडौं । बहुचर्चित मेलम्ची खानेपानी आयोजनाको सुरुङमा पानी भर्ने परीक्षण सुरु गरिएको छ ।
आयोजनास्थलमा आयोजित औपचारिक कार्यक्रममा खानेपानी मन्त्री मणिचन्द्र थापाले सुरुङमा पानी पठाएर परीक्षण गर्ने काम सुरु गरेका छन् । कार्यक्रममा विघटित प्रतिनिधिभाका सदस्य शेरबहादुर तामाङ सहित आयोजनाका मुख्यअधिकारी उपस्थित थिए ।
गत असारमै सुरुङमा पानी भरेर परीक्षण गर्न थाले पनि हेलम्बु गाउँपालिका–१ स्थित अम्बाथानको अडिटको मुख्य गेट (नं १७) फुटेर मानवीय क्षति भएको थियो । सो घटनामा एक जना इन्जिनियर र चालकलाई बगाएको थियो ।
त्यसपछि आयोजनाको मुख्य दातृ निकाय एसियाली विकास बैंक (एडीबी)को अनुदानमा चार जना विशेषज्ञको टोलीले सुरुङ, मुहानस्थल, गेटलगायत संरचनाको पुनः जाँच गरेको थियो । उनीहरुकै सुझावको आधारमा पानीको फोर्सले भत्काएको गेट समेत पुनर्निर्माण भएको थियो । सबै तयारी पुरा भएपछि आज पुनः परीक्षण गरिएको हो ।
पहिलोको जस्तो दुुर्घटना नहोस भन्नका लागि यसपाला आयोजनाले पहिल्यै विशेष सतर्कता अपनाएको छ । परीक्षणका क्रममा हुनसक्ने संभावित खतरालाई मध्यनजर गर्दै हेलिकोप्टरसमेत तयारी अवस्थामा राखिएको मेलम्ची खानेपानी विकास समितिका प्रवक्ता राजेन्द्र पन्तले बताएका छन् ।
मेलम्ची खोलादेखि काठमाडौंको सुन्दरीजलसम्मको साढे २६ किलोमिटर सुरुङ भरिन १६ दिन लाग्ने बताइएको छ ।
प्रतिक्रिया