काठमाडौं । काठमाडौंबासीको सपना बनेको मेलम्चीको पानी सुन्दरीजल आइपुगेको छ ।
बहुप्रतीक्षित मेलम्ची खानेपानी आयोजनाको पानी शनिबार साँझ सुन्दरीजलमा खसेको हो । मेलम्ची खोलाबाट पठाइएको पानी सुरुङहुँदै सुन्दरीजलमा खसाल्नका लागि प्रधानमन्त्री केपी शर्मा ओलीले बटम दबाएका थिए ।
सुन्दरीजलमा आयोजित विशेष कार्यक्रममा बटम दबाएपछि सम्बोधन गर्दै प्रधानमन्त्री केपी शर्मा ओलीले केही दिनभित्रै काठमाडौंवासीका घर घरमा मेलम्चीको पानी झर्ने बताए । प्रधानमन्त्री ओलीले भने, काठमाडौंमा मेलम्चीको पानी झर्यो । अब केही दिनभित्र तपाईंका धाराहरुमा पानी वितरण हुन्छ ।’
लामो समयको प्रतिक्षाको घडी सकिएको भन्दै प्रधानमन्त्री ओलीले सुन्दरीजलमा पानी आउनु नयाँ उचाइको सफलता भएको भन्दै काठमाडौंवासीलाई बधाई तथा शुभकामना दिए ।
प्रधानमन्त्री ओलीले मेलम्चीको दोस्रो चरणमा यांग्री र लार्केबाट पानी थपेपछि काठमाडौंलाई खानेपानी पुग्ने बताए । उनले बागमती सफाइमा पनि मेलम्चीको पानी सहयोगी बन्ने विश्वास व्यक्त गरे ।
यही फागुन १० गते मेलम्चीबाट सुरुङमा पानी पठाइएको थियो । खानेपानी आयोजनाका अनुसार केही समय यो पानीलाई बागमती नदीमा फालिनेछ । फोहोर थिग्रिसकेपछि भने सुन्दरीजलस्थित विशाल पानी ट्यांकीमा पठाइने छ । सोही ट्यांकीमा पानीलाई प्रशोधन गरी बैशाखको दोस्रो सातादेखि मेलम्चीको सञ्जाल फैलिएको स्थानका घरघरमा पानी वितरण हुने आयोजनाले जनाएको छ ।
मेलम्ची आयोजना दशकौं पहिलेदेखि काठमाडौंबासीको सपना बनेको थियो । तर, आयोजनाको भौतिक निर्माण सुरु भएको १२ वर्षपछि मेलम्चीको सुरुङबाट ल्याइएको पानी सुन्दरीजलमा आइपुगेको छ ।
प्रतिक्रिया