काठमाडौं । विश्वासको मत प्राप्त हुने या नहुने धरमरमा रहेका प्रधानमन्त्री केपी शर्मा ओलीले संवैधानिक निकायहरुमा रहेका रिक्त पदमा पदपूर्ति गर्न संवैधानिक परिषद्को बैठक बोलाएका छन् ।
परिषद्का अध्यक्ष समेत रहेका प्रधानमन्त्री ओलीले आइतबारका लागि बैठक बोलाएका छन् ।
ओलीले गत मंसिर ३० गते पहिलोपटक संवैधानिक परिषदसम्बन्धी अध्यादेश जारी गरेर अल्पमत सदस्यहरुको उपस्थितिमा पनि निर्णयहरु गर्ने प्रावधान राखेका थिए । सोही अध्यादेशको आधारमा पुष ५ गते ओलीले कैयौं संवैधानिक निकायहरुमा आफ्ना मान्छेहरु भर्ना गरेका थिए । अझै पनि लोकसेवा आयोगमा अध्यक्ष लगायतका सबै पदाधिकारी र अन्य कतिपय आयोगमा सदस्य रिक्त रहेका छन् । ओलीले तिनै रिक्त पदपूर्ति गर्न परिषद बैठक बोलाएका हुन् ।
प्रधानमन्त्री ओलीले संवैधानिक परिषदसम्बन्धी दोस्रो पटक अध्यादेश ल्याएका छन् । पहिलो पटकको अध्यादेश ६० दिनभित्र संसदमा प्रवेश नै नपाई खारेज भएका कारण केही दिन अघि सोही अध्यादेशलाई राष्ट्रपतिमार्फत पुनः जारी गराएका छन् । अध्यादेश अनुसार परिषद्को उपस्थित सदस्यको बहुमतले नियुक्ति सिफारिस गर्न सक्छ ।
ओलीले बोलाएको परिषद बैठकमा सभामुख अग्निप्रसाद सापकोटा र विपक्षी दलका नेता शेरबहादुर देउवा उपस्थित हुने सम्भावना कम छ । प्रधानमन्त्री अध्यक्ष रहने परिषदमा सभामुख, प्रधानन्यायाधीस, राष्ट्रिय सभा अध्यक्ष, विपक्षी दलका नेता र उपसभामुख सदस्य हुन्छन् । उपसभामुख पद लामो समयदेखि रिक्त छ ।
आइतबारको बैठकमा प्रधानमन्त्री, प्रधानन्यायाधीस र राष्ट्रिय सभा अध्यक्ष मात्र उपस्थित हुने देखिन्छ ।
प्रतिक्रिया