काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले संवैधानिक परिषद्को बैठकमा सहभागी नहुन सदस्यहरुलाई आग्रह गरेका छन् ।
अध्यक्ष प्रचण्डले शनिबार एक विज्ञप्ति प्रकाशित गर्दै संवैधानिक संरचनाको गरिमा समाप्त पार्ने मनसायको त्यस्तो बैठकमा सहभागी नहुन संवैधानिक परिषद्का सबै सदस्यहरुसँग आग्रह गरेका हुन् ।
प्रचण्डले विज्ञप्तिमा भनेका छन्, ‘संविधानको मर्म र भावना विपरित संवैधानिक निकायहरुलाई निरंकुशताको मतियार बनाउने गलत मनसाय सहित प्रधानमन्त्री के।पी शर्मा ओलीको सरकारले अध्यादेशको दुरुपयोग गर्दै आएको छ । यसै सन्दर्भमा लोकतान्त्रिक अभ्यास छलेर सरकारले एकपटक पुनः संवैधानिक परिषद्को बैठक मार्फत आफ्नो स्वेच्छाचारी चरित्र प्रदर्शन गर्दै छ ।’
अध्यक्ष प्रचण्डले प्रमुख प्रतिपक्षका नेता तथा सभामुख समेतले भाग नलिने निर्णय सार्वजनिक गरिसकेको स्थितिमा बैठक स्थगित गर्न सरकारसँग आग्रह समेत गरेकाछन् ।
प्रधानमन्त्री केपी शर्मा ओलीले भोलि आइतबार संवैधानिक परिषदको बैठक बोलाएका छन् । प्रमुख प्रतिपक्षी दल नेपाली कांग्रेसका सभापति शेरबहादुर देउवाले विज्ञप्ति नै जारी गरेर असंवैधानिक तबरले बोलाइएको संवैधानिक परिषद बैठकमा अनुपस्थित हुने घोषणा गरिसकेका छन् । यस्तै सभामुख अग्निप्रसाद सापकोटा समेत सो बैठकमा अनुपस्थित हुने जनाइसकेका छन् ।
प्रतिक्रिया