घोषित मितिमा निर्वाचन गराउनका लागि तयारीमा जुट्न आयोगका पदाधिकारीलाई प्रधानमन्त्री ओलीको निर्देशन

काठमाडौं । मध्यराती राष्ट्रपतिबाट मध्यावधि निर्वाचनको घोषणा गराएका प्रधानमन्त्री केपी ओलीले आज निर्वाचन आयोगका पदाधिकारीलाई प्रधानमन्त्री निवास बालुवाटार बोलाएर निर्वाचनको तयारीमा जुट्न निर्देशन दिएका छन् । आयोगका पदाधिकारीहरुलाई निवासमै बोलाएर प्रधानमन्त्री ओलीले घोषित मितिमा निर्वाचन गराउनका लागि तयारीमा जुट्न निर्देशन दिएका हुन् ।

बालुवाटारमा पुगेका आयोग पदाधिकारीलाई उनले आगामी कात्तिक २६ र मङ्सिर ३ गते हुने प्रतिनिधिसभाको मध्यावधि निर्वाचनको तयारीमा जुट्न निर्देशन दिए । उनले पदाधिकारीसँग राजनीतिक निकास अपरिहार्य भएकाले नै मुलुक निर्वाचनतर्फ नै अघि बढेको स्पष्ट पारेका थिए ।

राष्ट्रपति विद्यादेवी भण्डारीले सरकारका सिफारिसमा मध्यराति दुई चरणमा प्रतिनिधिसभाको मध्यावधि निर्वाचनको मिति तोकेकी छन् ।

निर्वाचनको मिति तोकेपछि प्रधानमन्त्रीले प्रमुख निर्वाचन आयुक्त दिनेशकुमार थपलियालगायत अन्य आयुक्तसंँग पनि आज छलफल गरेका हुन् ।