भैरहवाको बुद्ध चोकदेखि गौतमबुद्ध विमानस्थल अगाडिसम्म बुद्धमूर्तिले सिंगारिँदै

भैरहवा । रुपन्देहीको सिद्धार्थनगर नगरपालिका (भैरहवा) क्षेत्रका मुख्य सडकको डिभाइडरमा धमाधम बुद्धमूर्ति राख्ने काम भइरहेको छ । भैरहवाको बुद्ध चोकदेखि निर्माणाधीन गौतमबुद्ध विमानस्थलको टर्मिनल भवन अगाडिसम्म मूर्ति राख्ने काम जारी छ ।

पहेंलो धातुले लेपन गरिएका मेटलका मूर्ति सडकको बीच भाग (डिभाइडर) मा ठडाउन सुरु छ । यसले नगरको सौन्दर्यता थप सुन्दर बनाउँदै लगेको छ । लुम्बिनी प्रदेश सकार पर्यटन मन्त्रालय अन्तर्गत पर्यटक डिभिजन कार्यालयले उपलब्ध गराएको ७५ लाख रुपैयाँबाट अहिले मूर्ति राख्ने काम भइरहेको हो ।

कार्यालयले बुद्धमूर्ति उपभोक्ता समिति गठन गरेर अहिले धमाधम मूर्ति राखिरहेको छ । उपभोक्ता समिति अध्यक्ष भरतकुमार पोखरेलले चालु आर्थिक वर्षभित्रै बुद्ध चोकदेखि गौतमबुद्ध विमानस्थलसम्म १९ वटा बुद्धमूर्ति राखिने जानकारी दिए । उनले भने, ‘सिद्धार्थनगरलाई बुद्धमय बनाउने अभियान अन्तर्गत अहिले मूर्ति राख्ने काम जारी छ । यसले नगरको सुन्दरता थप गर्ने छ ।’

पोखरेलका अनुसार कोरोना महामारीले मूर्ति राख्न केही ढिलाइ भए पनि आबभित्रै सबै मूर्ति राख्ने गरी दु्रत गतिमा काम भएको छ । ‘डेढ महिना अघि मात्रै उपभोक्ता समिति गठन भएको हो । यसबीचमा निषेधाज्ञाले काममा केही ढिलाइ भएको छ । तर पनि हामीले रातदिन नभनी स्वास्थ्य सुरक्षा मापदण्ड अपनाएर काम गरिराखेका छौं’, उनले भने ।

अहिले मूर्ति राख्नका लागि पिलर बनाउने काम अन्तिम चरणमा पुगेको छ । काठमाडौंको पाटनमा मूर्ति धमाधम तयार भइरहेका छन् । ६ वटा मूर्ति भैरहवा ल्याएर जडानको काम जारी छ । ‘बाँकी मूर्ति पनि आवभित्रै तयार हुन्छन्, त्यसपछि हामीले यहाँ ल्याएर जडान गर्नेछौं’, उपभोक्ता समिति कोषाध्यक्ष कृष्ण भट्टराईले भने ।

अघिल्लो आर्थिक वर्षमा सिद्धार्थनगर नगरपालिकाले बुद्धमूर्ति व्यवस्थापन उपभोक्ता समिति गठन गरेर भैरहवाको अंचलपुरदेखि बेलहिया बाइपास सडकसम्म बुद्धमूर्ति राखेको थियो । उक्त समतिको पनि अध्यक्ष भएर पोखरेलले काम गरेका थिए । त्यसबेला नगरले ४६ लाख रुपैयाँ उपलब्ध गराएको थियो भने उपभोक्ता समितिले विभिन्न संघसंस्था र उद्योगी–व्यवसायीसँग सहकार्य गरी २५ लाख रुपैयाँ सहयोग उठाएर मूर्ति व्यवस्थापनको काम गरेको थियो ।

उक्त रकमबाट अघिल्लो वर्ष १९ वटा बुद्धमूर्ति सडक डिभाइडरमा राखिएको छ । सिद्धार्थनगर नगरपालिका प्रमुख हरिप्रसाद अधिकारीले नगरपालिकालाई बुद्धमय बनाउने अभियानअनुसार मूर्ति राख्ने काम भइरहेको जनाए । उनले भने, ‘यो शान्तिभूमि, पर्यटकीय नगर हो । यहाँ जति सुन्दरीकरण गर्न सक्यौं । यसले नगरको गरिमा मुलुकमा मात्रै नभई देशविदेशमा पनि जान्छ ।’

सहज अवस्थामा बेलहिया नाका हुँदै लाखौं विदेशी पर्यटक नेपाल भित्रिन्छन् । नाकाबाट आउने पर्यटकले पहिलो पाइल नगरमै टेक्ने भएकाले यहाँ बुद्ध चिनारीका कुनै वस्तु नहुँदा बुद्धभूमि आएकोसमेत थाहा पाउँदैनथे । अहिले बुद्धमूर्ति राखिए पछि पर्यटकले नाकामा आउँदावित्तिकै बुद्धभूमिमा आएको महसुस गर्न सक्ने अधिकारीले बताए ।

उपभोक्ता समिति अध्यक्ष पोखरेलले भैरहवालाई शान्ति र सुन्दर नगरी बनाउन चाहेको र सोहीअनुसार जनप्रतिनिधिसँग हातेमालो गरेर आफूहरुले काम गरिरहेको बताए । ‘सिद्धार्थनगर भनेको बुद्धस्थल हो । नेपाल आउने पर्यटकले शान्तिको सन्देश लिएर जानुपर्छ । सिद्धार्थनगर, लुम्बिनी र नेपालप्रति पर्यटकको माया थप बढोस् । उनीहरुले बुद्धको ज्ञान संसार भरी छरुन भन्ने उद्देश्यले मूर्ति राखिएको हो’, पोखरेलले भने ।