काठमाडौं । सरकारले नेपाल रेल्वे कम्पनी लिमिटेडको महाप्रबन्धकमा माधवकुमार नेपाल निकट निरञ्जन झालाई नियुक्त गरेको छ ।
बिहीबार सिंहदरबारमा बसेको मन्त्रिपरिषद् बैठकले माधवकुमार नेपाल नेतृत्वको नयाँ पार्टी एमाले (समाजवादी)का युवा नेता तथा नेपाल पक्षीय युवा संघका केन्द्रीय उपाध्यक्ष सप्तरीका झालाई महाप्रवन्धक नियुक्त गरेको हो । उनी सप्तरीको राजविराज नगरपालिका-१ निवासी हुन ।
यसअघि तत्कालीन प्रधानमन्त्री केपी शर्मा ओलीले नियुक्त गरेको महाप्रबन्धक गुरु भट्टराईलाई शेरबहादुर देउवा नेतृत्वको वर्तमान सरकारले स्पष्टीकरण सोधेपछि उनले राजीनामा दिएका थिए । भट्टराईले महाप्रबन्धकबाट राजीनामा दिएपछि रिक्त पदमा झालाई नियुक्त गरिएको एक मन्त्रीले जानकारी दिए ।
नेता नेपालले एमाले (समाजवादी) गठन गर्न निर्वाचन आयोगमा निवेदन दिएसँगै सरकारले उनी पक्षकालाई राजनीतिक नियुक्ति दिन थालेको छ ।
बिहीबारकै मन्त्रिपरिषदले नेता नेपालनिकट यादवचन्द्र शर्मालाई बागमती प्रदेश प्रमुख नियुक्त गर्ने निर्णय गरेको थियो ।
प्रतिक्रिया