काठमाडौं । एमाले भित्र सुरुदेखि अध्यक्ष केपी ओली नै सर्वसम्मत अध्यक्ष भन्दै आएको ओली पक्षीय नेताहरुलाई चुनौती दिँदै एमालेको महाधिवेशनमा नेकपा एमालेका उपाध्यक्ष डा. भीम रावलले अध्यक्ष पदका लागि उम्मेदवारी घोषणा गरेका छन् ।
रिपोर्टर्स क्लवमा आफ्नो उम्मेदवारी घोषणा गर्दै उपाध्यक्ष रावलले अध्यक्ष केपी शर्मा ओलीले आगामी महाधिवेशनमा अध्यक्ष पदको दाबी नगर्ने घोषणा गरिसकेकाले आफुले उम्मेदवारी घोषणा गरेको बताए ।
उमेर, क्षमताका हिसावले ओलीको नेतृत्वलाई जनताले महसुश गरिसकेको उल्लेख गर्दै रावलले अध्यक्ष ओलीले सुरु गरेको पार्टी निर्माणको कामलाई आफुले पुरा गर्ने बताए । उनले आफुलाई अध्यक्ष पदका लागि भरोसा गर्न अध्यक्ष ओलीलाई आग्रह गरे ।
उनले महाधिवेशनमा आफ्नो कुनै प्यानल नहुने बताउँदै आफू एक्लै चुनाव लड्ने जानकारी दिए । उनले सहमति गरेर मात्रै उम्मेदवारी गर्ने भन्ने पार्टीको कुनै निर्णय नभएको भन्दै आफ्नो उम्मेदवारीलाई अस्वभाविक मान्नुपर्ने कुनै कारण नभएको बताए।
जनताको बहुदलीय जनवादले प्रतिस्पर्धाको अधिकार दिएको भन्दै रावलले उम्मेदवारी घोषणामा कसैले रोक्न नसक्ने पनि धारणा राखे ।
प्रतिक्रिया