बुटवल । प्रेस चौतारी नेपालको लुम्बिनीमा हुने केन्द्रीय कमिटीको बैठकका लागि आइतबार समन्वय तथा सम्पर्क सचिवालय स्थापना भएको छ । रुपन्देहीको लुम्बिनीमा पौष १२ र १३ गते हुने केन्द्रीय कमिटी बैठकको व्यवस्थापनका लागि सम्पर्क सचिवालय स्थापना भएको हो । सम्पर्क सचिवालयको आईतबार एक कार्यक्रमका बीच चौतारीका केन्द्रीय अध्यक्ष गणेश बस्नेतले शुभारम्भ गरे ।
सचिवालयको शुभारम्भ गर्दै बस्नेतले बैठकलाई भब्य र सभ्य रुपमा सफल बनाउन सबै क्रियाशिल चौतारीका सदस्य पत्रकारहरुलाई आह्वान गरे । बैठक आयोजनाको तयारी बारेमा आतिथ्यशाखा प्रेस चौतारी रुपन्देही अध्यक्ष अमृत गिरी लगायतका पदाधिकारीसँग बस्नेतले जानकारी लिएका थिए । देशभरबाट उपस्थित हुने प्रतिनिधि तथा अतिथीहरुको व्यवस्थापनका लागि सचिवालयले तयारी अगाडी बढाएको चौतारीका वरिष्ठ उपाध्यक्ष माधव नेपालले जानकारी दिए ।
बैठकको एमाले प्रचार विभागमा नव नियुक्त प्रमुख पृथ्वी सुब्बा गुरुङले उदघाटन गर्ने कार्यक्रम तय भएको चातारी रुपन्देही अध्यक्ष अमृत गिरीले बताए । बैठकमा एमाले प्रचार उप प्रमुख विष्णु रिजालको पनि उपस्थिती रहने उनले बताए ।
केन्द्रीय कमिटी बैठकमा देशभरबाट केन्द्रीय कमिटी सदस्य तथा अतिथीहरुसहित ३ सय बढीको सहभागिता रहने प्रेस चौतारीका केन्द्रीय सदस्य तथा रुपन्देही इन्चार्ज प्रदिप आचार्यले बताए । बैठक सफल बनाउनका लागि प्रेस चौतारी रुपन्देहीशाखाको आतिथ्यता रहने चौतारीले जनाएको छ ।
प्रतिक्रिया