नेपालगञ्ज । स्थानीयतह निर्वाचनमा राप्रपाको दुबै समूहसँग गठबन्धनका लागि सम्बाद जारी रहेकै अवस्थामा नेकपा एमालेले नेपालगञ्ज उपमहानपालिकाको मेयर र उपमेयरको उम्मेदवार सिफरिस गरेको छ । राप्रपाको लिङ्डेन समुहका उपाध्यक्ष तथा नेपालगन्जका वर्तमान मेयर डा. धवलसम्सेर राणासँग सम्बाद जारी रहेकै अवस्थामा एमालेले मेयर र उपमेयर दका लागि उम्मेदवारहरुको नाम सिफारिस गरेको हो ।
नेपालगञ्ज नगर कमिटीको सोमबार बसेको बैठकले पार्टीका केन्द्रीय सदस्य पशुपतिदयाल मिश्र र उपमेयरमा शान्ति ढकाललाई उम्मेदवार बनाउन सर्वसम्मत सिफारिस गर्ने निर्णय गरेको छ ।
मिश्र र ढकाललाई मेयररउपमेयरमा सर्वसम्मत सिफारिस गर्ने निर्णय भएको एमाले केन्द्रीय सदस्य एवं जिल्ला इन्चार्ज सूर्य ढकालले जानकारी दिए ।
नेपालगन्जमा प्रतिनिधिसभा निर्वाचनमा डा. धवललाई समर्थन दिनेगरि स्थानीयतहमा राप्रपाबाट एमालेले समर्थन खोजेको चर्चा सार्वजनिक भएको थियो । अघिल्लो हप्ता नेपालगन्ज पुगेका नयाँ राप्रपा बनाएर हिँडेका कमल थापाले पनि एमालेसँग वार्ता जारी रहेको खुलासा गरेका थिए । उनले त आफुहरु सुर्य चिन्हबाट चुनाव लड्न सक्ने सम्भावना समेत देखाएका थिए ।
लामो समयदेखि मधेशबादी नेता हृदयेश त्रिपाठीको समुहमा रहेका मिश्र मेयरको उम्मेदवारको पक्कापक्की भए पछि १ मंसिरमा एमाले प्रवेश गरेका थिए । २०७४ को निर्वाचनमा उनी त्रिपाठी समुहमै रहेर सूर्य चुनावचिन्ह लिएर बाँके क्षेत्र २ बाट प्रतिनिधिसभा सदस्य उम्मेदवार थिए ।
बाँकेका पुराना पञ्चायती राजनीतिज्ञका रूपमा परिचित मिश्रले नेपाली कांग्रेसबाट राजनीति सुरु गरेपनि लामो समय पञ्च बनेर तत्कालिन राजतन्त्रको सेवा गरेका थिए । मधेस आन्दोलनपछि मधेशबादी दलहरुको भ्रमण गर्दै अन्तमा राष्ट्रिय जनता पार्टी बन्ने क्रममा त्रिपाठी समूहमा मिसिन पुगेका थिए ।
एमाले नेतृ ढकाललाई भने पार्टीले यस पटक पनि उपमेयर कै उम्मेदवार बनाउने सिफारिस गरेको छ । सम्भवतः राप्रपासँग तालमेल भएमा ढकालको उम्मेदवारी फिर्ता हुने सम्भावना रहेको एमाले बाँकेका एक जिल्ला नेताले बताए । २०७४ को स्थानीय चुनावमा पनि उनी उपमेयरकी उम्मेदवार थिइन् । एमाले राजनीतिमा बामदेव खेमाकी नेतृकारुपमा रहेकी ढकालले अन्तिममा बामदेव गौतमको साथ छाडेर एमाले मै रहेकी थिइन् ।
प्रतिक्रिया