नेपालमा अति संक्रामक भेरियन्ट ओमिक्रोनका ९ वटा सवभेरियन्ट सक्रिय

काठमाडौं । नेपालमा कोरोना संक्रमितको संख्यामा केही दिनयता पुन: वृद्धि हुन थालेको छ । शून्यमा झरेको कोरोना संक्रमणको अवस्था विस्तारै बढ्दै गएको हो ।

स्वास्थ्य तथा जनसंख्या मन्त्रालयका अनुसार सोमबार मात्र देशभरमा ७६ जना कोरोना भाइरसका नयाँ संक्रमित फेला परेका छन् । यसका साथै अहिले नेपालमा अति संक्रामक भेरियन्ट ओमिक्रोनका ९ वटा सवभेरियन्ट सक्रिय रहेको पाइएको छ । जसमध्ये पनि पछिल्लोपटक भेटिएको एक्सबीबी.१.१६ सबैभन्दा धेरै रहेको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार चैत्र महिनामा संकलन गरिएका २४ वटा नमुनाको सिक्वेन्सिङ गर्दा २४ वटैमा ओमिक्रोन भेरियन्ट भेटिएको छ । साथै अहिले भारतमा फैलिएको ओमिक्रोन एक्सबीबी.१.१६ सहितका ९ वटा सवभेरियन्ट रहेको मन्त्रालयले विज्ञप्ति जारी गर्दै जनाएको छ ।

मन्त्रालयले सचेत रहन अनुरोध गरेको छ । अहिले भेटिएका भेरियन्टहरु अतिसंक्रामक रहेकाले सचेतनाका साथै भ्याक्सिन लगाउने अभियानलाई पनि तीव्रता दिनुपर्ने बताएको छ ।