नेपालगन्ज । समावेशी प्यानलले नेपालगन्ज उद्योग वाणिज्य संघको आगामी २ भाद्रमा हुन लागेको निर्वाचनमा आफ्नो प्यानलमा मतदान गर्न आममतदाता तथा उद्योगी व्यवसायीहरुसँग अपिल गरेको छ ।
समावेशी प्यानलका संयोजक र्ईश्वरप्रसाद पोखरेल, नेपालगन्ज उद्योग वाणिज्य संघका पूर्वअध्यक्षद्वय कृष्णप्रसाद श्रेष्ठ र नन्दलाल वैश्यको संयुक्त हस्ताक्षरमा अपिल जारी गर्दै समग्र बाँके क्षेत्रको प्रतिनिधित्व हुने सानादेखि ठूला व्यापारिक घरानासम्मका उद्योगी र व्यवसायीलाई उम्मेदवारहरुका रुपमा चयन गरिएको स्मरण गराइएको छ ।
उनीहरुले समावेशी प्यानल एकताबद्ध भएर चुनावी अभियानमा जुटेको र एकतामा फुट ल्याउन, बैैमनस्यता कायम गर्न, उद्योगी व्यवसायीबीच फाटो ल्याउन अनेक भ्रम छर्ने, हुँदै नभएका कुराहरु अतिरञ्जित गर्ने इत्यादि खेलहरु हुनसक्ने तर्फ निकै संयम र चनाखो हुन मतदातालाई सचेत गराइएको छ ।
‘व्यक्तिगत स्वार्थ सिद्धि वा कसैको बहकाउमा लागेर वा भ्रामक सूचनाका आधारमा धारणा नबनाउन सम्पूर्ण उद्योगी व्यवसायीसँग आग्रह गर्दछौं । समावेशी प्यानलको एकता अक्षुण्ण राखेर तन, मन, बुद्धि, र बर्कतले पूरै प्यानललाई विजयी बनाउने अभियानमा लाग्न हामी सम्पूर्ण मतदाता, उद्योगी व्यवसायीहरुमा अनुरोध गर्दछौं’, अपिलमा भनिएको छ, ‘उद्योगी व्यवसायीबीचको एकता नै सिंगो समावेशी प्यानलको जित हो । उद्योगी व्यावसायीहरुको हित हो ।’
भाद्र २ गते हुने निर्वाचनका लागि नेपालगन्जमा साझा प्रजातान्त्रिक प्यानल र समावेशी प्यानलका नाममा २ वटा ब्यवसायीक समुह चुनावी प्रतिस्पर्धामा रहेका छन् । साझा प्रजातान्त्रिक समुहको नेतृत्व ललितकुमार रौनियार र समेवेशी प्यानलको नेतृत्व टंक धामीले गरेका छन् ।
निर्वाचन कार्यबिधिमा तोकिएको संख्या भन्दा बढी वा कम मतदान गर्दापनि सम्पूर्ण मत बदर हुने भएको जनाउँदै तोकिएको संख्यामा मात्र मतदान गर्न निर्वाचन समितिले मतदातालाई आग्रह गरेको छ ।
प्रतिक्रिया