तीजमा पशुपति क्षेत्रमा २ दिन रक्सी-मासुमाथि प्रतिबन्ध

काठमाडौं । जिल्ला प्रहासन कार्यालय काठमाडौंले तीज पर्वलाई मध्यनजर राख्दै आजबाट पशुपति क्षेत्रमा रक्सी मासुमाथि प्रतिबन्ध लगाएको छ । शान्ति सुरक्षा तथा धार्मिक क्षेत्रको पवित्रतालाई जोगाउन भन्दै प्रशासनले रक्सी मासुमा प्रतिबन्ध लगाएको हो ।

पशुपति क्षेत्रको ४ किल्ला नै तोकेर प्रशासनले मांस, मदिरा तथा नशालु पदार्थ उत्पादन, ओसारपसार, भण्डारण तथा बिक्रिवितरण गर्न प्रतिबन्ध लगाएको जनाएको छ । प्रशासनले सूचना जारी गर्दै पाशुपत क्षेत्रको पूर्व गौशाला मित्रपार्क सडकदेखि पूर्व, पश्चिम पशुपति क्षेत्रको पूर्व सिमाना देखि पश्चिम, उत्तर गौशाला तिलगङ्गा चक्रपथ देखि उत्तर र दक्षिणमा मित्रपार्क, उमाकाण्ड, गौरीघाट हुँदै बागमती देखि दक्षिण क्षेत्रमा मांस, मदिरा सहित नशालु पदार्थमा प्रतिबनध लगाएको हो ।

सूचनामा स्थानीय प्रशासन ऐन २०२८ को दफा ६ को ३ (क) र (ख) अनुसार आज ३१ गते बिहानै देखि पूर्णरुपमा रोक लगाएको जनाइएको छ । आदेश वितरित भएमा ऐन बमोजिम कडा कारवाही गरिने समेत सूचनामा उल्लेख गरिएको छ ।