बुटवल । पतञ्जली योगपीठ भारतका अध्यक्ष आचार्य बालकृष्ण सहित उनका २०० बढी जम्बो टोली पाल्पाको बसन्तपुर स्थित कामाख्यादेवीको दर्शन गर्न पुगेका छन् । आचार्यको अनुयायीहरु र बुटवलको मुक्तिनाथ धामका संरक्षक लोकानन्द स्वामीले समेतको टोलीले आज कामाख्यादेवी मन्दिरको दर्शन गरेका हुन् ।
आचार्य बालकृष्णसँगै बसन्तपुर पुगेका नेपाली र भारतीय पत्रकारहरुसँग कुरा गर्दै आचार्यले भारतीय पर्यटकका लागि नेपाल सहज गन्तव्य रहेको बताए । उनले प्राकृतिक सुन्दरता, आवत जावतको सहजता, भाषिक, धार्मिक, सांस्कृति समानताले भारतीय पर्यटकका लागि नेपाल सहज गन्तव्य भएको बताए ।
नेपाल बुद्ध, पशुपतिनाथ, मुक्तिनाथ, जानकी र वाल्मीकिको भूमि भएको उल्लेख गर्दै आचार्य बालकृष्णले नेपालका यी धार्मिक पर्यटकीय स्थललाई भारत सरकारले अघि सारेको रामायण र शिव सर्किटमा नेपाललाई जोडेर पर्यटन प्रवर्द्धनमा पहल गर्नुपर्ने बताए ।
उत्तर प्रदेशसँग जोडिएको बुटवलमा बनेको लुम्बिनी केबलकार भारतीय पर्यटकका लागि नजिकको आकर्षक गन्तव्य बन्न सक्ने उनले बताए ।
उनले उत्तर प्रदेशका नागरिक केबलकार चढ्न हिमाञ्चल प्रदेश जानुपर्ने अवस्था रहेको बताउँदै त्यहां पुग्नभन्दा बुटवल आउन उनीहरुका लागि धेरै नजिक भएको बताए ।
भैरहवाको गौतमबुद्ध अन्तर्राष्टिय विमानस्थल पूर्ण क्षमतामा सञ्चालन हुन सके भारतीय र विदेशी पर्यटक आगमन बढ्न सक्ने भन्दै उनले त्यस तर्फ ध्यान दिन पनि सुझाव दिए ।
रुपन्देहीको धकधईमा एक अर्ब लागतमा जडिबुटी प्रशोधन गरी आयुर्वेदिक औषधि र कस्मेटिक वस्तु उत्पादन गर्ने उद्योग स्थापनाको अन्तिम चरणमा रहेको जानकारी दिँदै उनले उक्त उद्योगमा कम्तीमा पाँच सय जनाले रोजगारी पाउने दाबी गरे ।
४० वर्षपछि पहिलोपटक आचार्य गृह जिल्ला स्याङजामा दशैं पर्व मनाउने आएका हुन् ।
आचार्य बालकृष्णलाई स्वागत गर्दै लुम्बिनी केबलकारका निर्देशक रुद्र पौडेलले नेपालीसँगै भारतको उत्तर प्रदेशको २४ करोड जनसंख्यालाई लक्षित गरेर बसन्तपुरमा पांचतारे होटेल संचालनको तयारी गरिएको बताए ।
पौडेलले सञ्चालनको ५ महिनामै बसन्तपुरको कामाख्यादेवी मन्दिर भारत उत्तर प्रदेशका पर्यटकको लागि आकर्षणको थलो बनेको बताए ।
प्रतिक्रिया