बुटवल । नेकपा एमाले रुपन्देहीले भूकम्पबाट प्रभावित रुकुम पश्चिममा पुनःनिर्माणमा सघाउन स्वयंसेवक पठाएको छ ।
एमालेले भूकम्पबाट सयौं भौतिक संरचना भत्किएर क्षति भएको पश्चिम रुकुमको बिसकोट नगरपालिकामा तत्कालको लागि अस्थायी घरटहरा निर्माणका लागि भन्दै रुपन्देहीबाट २० जना स्वयंसेवकको टोली पठाएको हो ।
एमाले रुपन्देहीका अध्यक्ष तेजेन्द्र केसीले मंसिर ५ गतेदेखि आगामी १७ गतेसम्म निरन्तर सर्वसाधारणका भत्किएका घरटहरा निर्माणका लागि २० जना स्वयंसेवकको टोली पठाएको जानकारी दिए ।
अध्यक्ष केसीले भूकम्प प्रभावित क्षेत्रमा काम गर्न आवश्यक पर्ने गैंती, बेल्चा, हाते आरा, हथौडा, खुर्पा लगायतका औजार तथा स्वयंसेवकहरुको सुरक्षँको लागि ज्याकेट, पञ्जा, हेलमेट लगायतका आवश्यक सामग्री र खाने बस्ने खर्च समेतको व्यवस्था गरि पठाईएको जानकारी दिए । अध्यक्ष केसीले यसअघि २०७२ सालको भूकम्पबाट ध्वस्त बनेका संरचनाको पूनर्निर्माणको लागि समेत स्वयंसेवक खटाईएको उल्लेख गर्दै अहिलेपनि त्यति बेला काममा खटिएका अनुभवी स्वयंसेवकहरुलाई पठाईएको जानकारी दिए ।
अध्यक्ष केसीले विगतमा जस्तै यसपटक पनि भूकम्प प्रभावित क्षेत्रका बासिन्दाको घाउमा मल्हम लगाउने गरी अनुशासित भएर काम गरेर फर्किन टोलीमा सहभागीहरुलाई निर्देशन दिए । नेकपा एमालेले यसअघि नै भूकम्प प्रभावित क्षेत्रमा एकहजार एकसय जना स्वयंसेवक परिचालन गरिसकेको जनाएको छ । स्वयंसेवकहरुले भूकम्पले भत्काएका घरभित्रका सामानहरु निकाल्ने, भग्नावशेष पन्छाउने र जमिन सम्याएर अस्थायी घरटहरा बनाउने काम शुरु गरेका छन् ।
पार्टी केन्द्रको तर्फबाट एकहजार र प्रदेशका एकसय गरी ११ सय स्वयंसेवक भूकम्प प्रभावित जिल्ला जाजरकोट र पश्चिम रुकुममा खटिएको रुपन्देही अध्यक्ष केसीले जानकारी दिए ।
जाजरकोटमा सातसय र रुकुमपश्चिममा चारसय स्वयमसेवक परिचालन भएका छन् । एमालेका जनसंगठनहरु नेपाल ट्रेड युनियन महासंघ जिफन्ट, अनेरास्ववियु, राष्ट्रिय युवा संघ नेपाल, राष्ट्रिय खेलकुद महासंघ तथा पार्टीका प्रदेश कमिटीबाट दक्ष जनशक्ति सहितको स्वयंसेवकहरुको टोलीलाई २८ वटा समूहमा विभाजन गरि मंसिर १ गतेदेखि नै खटाइएको एमाले पोलिटब्युरो सदस्य तथा जिफन्टका अध्यक्ष विनोद श्रेष्ठले जानकारी दिए । एमालेले २०७२ सालको भूकम्पमा पनि स्वयंसेवक परिचालन गरी २७ हजार २७६ अस्थायी घरटहरा र १३ सयभन्दा बढी विद्यालयका अस्थायी संरचना निर्माण गरेको थियो ।
गत कात्तिक १६ गते राती जाजरकोटको रामीडांडा केन्द्रविन्दु बनाएर ६ दशमलव ४ म्याग्निच्युटको भूकम्प गएको थियो ।
उक्त भूकम्पमा परी एकसय ५४ जनाको मृत्यु भएको थियो भने तीन सय ४६ घाइते भएका छन् । भूकम्पका कारण २६ हजार पांच सय ५७ निजी घर पूर्णरुपमा ध्वस्त भएका थिए ।
त्यस्तै ३५ हजार चार सय ५५ घरमा आंशिक क्षति भएको सरकारी तथ्यांक छ । बालबालिका, वृद्धवृद्धा, सुत्केरी, गर्भवती तथा विरामी र अशक्त व्यक्तिहरु झनै विरामी परेका छन् ।
प्रतिक्रिया