बुटवल। नक्कली सवारी चालक अनुमति पत्र (लाइसेन्स) प्रकरणको जालो बुटवल सम्म पुगेको छ । सोमबार यातायात व्यवस्था कार्यालय बुटवलमा कार्यरत शाखा अधिकृत नारायण पाण्डेलाई पक्राउ गरिएसँगै नक्कली सवारी चालक अनुमति पत्र प्रकरणको जालो बुटवल सम्म पुगेको खुलासा भएको हो । केन्द्रीय अनुसन्धान ब्यूरो (सीआईबी)ले सोही प्रकरणमा आज यातायात व्यवस्था कार्यालय बुटवलमा कार्यरत शाखा अधिकृत पाण्डेलाई पक्राउ गरेको छ ।
नक्कली सवारी अनुमति पत्र प्रकरणमा पक्राउ पर्ने पर्ने पाण्डे तेस्रो आरोपी हुन् । उनीसँगै सीआईबीले अहिलेसम्म तीन जनालाई पक्राउ गरेर अनुसन्धान अघि बढाएको जनाएको छ ।
गत शुक्रबार मात्र हाल अख्तियार दुरुपयोग अनुसन्धान आयोगमा कार्यरत आईटी इन्जिनियर सुरजप्रकाश अर्याल र यातायात व्यवस्था कार्यालय बुटवलमै करार इन्जिनियरको रुपमा कार्यरत हरिश भट्ट पक्राउ परेका थिए ।
शुक्रबार पक्राउ परेकाहरुलाई ५ दिन हिरासतमा राखेर अनुसन्धान गर्न प्रहरीले जिल्ला अदालतबाट अनुमति लिइ सकेको छ भने सोमबार पक्राउ गरेका पाण्डेलाई भने मंगलबार अदालतमा उपस्थित गराउने प्रहरीले जनाएको छ ।
ट्राफिक प्रहरीको कारबाहीबाट यातायात कार्यालय ल्याइएका लाइसेन्सहरुको कीर्ते गरी सोही नम्बरमा अर्को लाइसेन्स बनाएर बिक्रि गर्ने गरेको भेटिएपछि अनुसन्धान थालिएको सीआईबीका प्रमुख एआईजी श्यामलाल ज्ञवालीले बताए ।
उनीहरुविरुद्ध सरकारी लिखत कीर्तेको कसुरमा सीआईबीले अनुसन्धान अघि बढाएको उनले बताए । ट्राफिक कारवाहीमा बरामद केही लाइसेन्सको नम्बर मेल खाएपनि त्यस्तो संख्या धेरै हुन सक्ने अनुमान गरिएको छ ।
यातायात व्यवस्था विभागले उपसचिव मुकेश रेग्मीको संयोजकत्वमा समति गठन गरी नक्कली लाइसेन्सबारे छानबिन गर्दा विगत ८ वर्षको अवधिमा १ लाख भन्दा बढी नक्कली लाइसेन्स जारी भएको खुलेको थियो ।
प्रतिक्रिया