काठमाडौं । मिनबहादुर गुरुङबाट पार्टीले ‘दान’मा जग्गा लिएको विषयमा आलोचना गरेका तीन प्रभावशाली नेतालाई नेकपा एमालेले कारवाही गरेको छ ।
एमालेको आज बसेको सचिवालय बैठकले पार्टीका पूर्वउपाध्यक्ष एवं प्रभावशाली नेता भिम रावललाई पार्टीबाट निस्काशन गरेको छ भने स्थायी कमिटी सदस्य विन्दा पाण्डे र केन्द्रीय सदस्य उषाकिरण तिमल्सेनालाई ६ महिना निलम्बन गरेको छ ।
तीनै नेताका अभिव्यक्तिहरु पार्टी नीति विपरित भएको एमालेले ठहर गरेको छ । बैठकपछि संचारकर्मीसँग कुरा गर्दै उपमहासचिव एवं प्रवक्ता प्रदीप ज्ञवालीले भने, ‘पार्टीलाई पार्टीलाई निरन्तर कमजोर बनाउने अभिव्यक्ति दिएका कारण भीम रावललाई संगठित सदस्यबाट मुक्त गरिएको छ ।’
बैठकले स्थायी कमिटी सदस्य पाण्डे र केन्द्रीय सदस्य तिमल्सेनालाई सोधिएको स्पष्टीकरणको जवाफ चित्तबुझ्दो नभएको भन्दै ६ महिनाका लागि जिम्मेवारीबाट मुक्त गर्दै पार्टीको निर्देशनमा चल्न निर्देशित गरेको छ ।
बैठकले सरकारको कामकारवाहीका राम्रो रहेको निस्कर्ष निकालेको छ । यद्यपी सरकारका काममा थप गति ल्याउनुपर्ने आवश्यकता बोध गरेको उपमहासचिव ज्ञवालीले बताए ।
बैठकले पुस २१ र २२ गते केन्द्रीय कमिटी बैठक बोलाउने निर्णय गरेको छ ।
प्रतिक्रिया