काठमाडौं । चाइना फाउन्डेसन फर रुरल डेभलपमेन्टले अलिबाबा परोपकार संस्थाको सहयोगमा नेपाली युवाहरुलाई खेलकुद किटहरु सहयोग गरेको छ ।
लुम्बिनी अन्तर्राष्ट्रिय शान्ति महोत्सवको रात्रिभोजमा फाउन्डेसनले अलिबाबा फाउन्डेशनको ‘पाण्डा प्याक खेलकुद किट परियोजना’ सुरु गर्दै नेपाली युवाहरुलाई सो खेलकुद किट सहयोग गरिएको हो ।
संस्कृति, पर्यटन तथा नागरिक उड्डयनमन्त्री बद्री पाण्डे, नेपालका लागि चिनियाँ राजदूत चेन सोङ र नेपाल पर्यटन बोर्डका प्रमुख कार्यकारी अधिकृत दीपकराज जोशीको उपस्थितिमा सो किट सहयोग हस्तान्तरण गरिएको हो ।
त्यसअवसरमा चाइना फाउन्डेसन फर रुरल डेभलपमेन्ट नेपालका निर्देशक जोउ झिकियाङले नेपाल ओलम्पिक समितिका अध्यक्ष जीवनराम श्रेष्ठलाई करिब १५ सयवटा खेलकुद सामाग्रीका लागि आवश्यक दुई करोड ८० लाख रुपैयाँ बराबरको सहयोग चेक हस्तान्तरण गरिन् । यो सहयोगले नेपालका २०० सरकारी विद्यालयका विद्यार्थीहरुको खेलकुद गतिविधिमा सहयोग पुर्याउने विश्वास गरिएको छ ।
सो खेलकुद सामाग्रीमा फुटबल, भलिबल, बास्केटबल, टेबल टेनिस प्याडल र बल, ब्याडमिन्टन ¥याकेट र सटलकक, जम्प रोप, पोर्टेबल एयर पम्प, ट्रेनिङ कोन, ट्रेनिङ भेस्ट, फ्रिसबी, र सिटी जस्ता खेल सामग्रीहरू समावेश छन् ।
यो परियोजनाले नेपाली युवाहरूमा ओलम्पिक भावनालाई प्रोत्साहन गर्ने लक्ष्य राखेको छ । निर्देशक जोउ झिकियाङले भनिन्, “हामी आशा गर्छौं कि यी खेल सामग्रीहरूमार्फत नेपाली युवाहरूलाई खेलकुदप्रति प्रेम विकास गर्न प्रेरित गर्न सकिन्छ । नेपालको समग्र शिक्षा प्रणालीमा खेलकुदको महत्वलाई बढाउन सकिन्छ र नेपाल ओलम्पिक कमिटीलाई प्राथमिक र माध्यमिक विद्यालयका विद्यार्थीहरूमाझ ओलम्पिक भावनालाई प्रवद्र्धन गर्न सहयोग गर्न सकिन्छ । साथै, हामी यी सामग्रीहरूले नेपाली स्कूलहरूमा खेल शिक्षण र गतिविधिहरूका लागि थप अवसरहरू सिर्जना गर्नेछन् भन्ने अपेक्षा पनि गर्छौं, जसले नेपालमा शारीरिक शिक्षाको लोकप्रियता र विकासलाई बढावा दिनेछ, र स्वस्थ शरीर र सकारात्मक भावनाका साथ भविष्यका प्रतिभाहरूको विकास गर्नेछ।”
यस्तै, नेपाल ओलम्पिक समितिका अध्यक्ष जीवनराम श्रेष्ठले अलीबाबा परोपकार र चाइना फाउन्डेसन फर रुरल डेभलपमेन्टको उदार दानप्रति कृतज्ञता व्यक्त गर्दै भने, “यो बहुमूल्य उपहारले नेपालमा युवा खेलकुदको विकासलाई ठूलो सहयोग पु¥याउनेछ ।” उनले भविष्यमा चाइना फाउन्डेसन फर रुरल डेभलपमेन्टसँगको सहकार्यलाई निरन्तरता दिँदै नेपालमा खेलकुदको प्रगतिलाई संयुक्त रूपमा अगाडि बढाउन तत्पर रहेको बताए ।
यसअघि, चाइना फाउन्डेसन फर रुरल डेभलपमेन्टले नेपाल–भारत सीमा क्षेत्रमा अवस्थित लुम्बिनीका १० सरकारी स्कूलहरूको भ्रमण गरी ६० खेलकुद किटहरू वितरण गरेको थियो । जसबाट करिब ६ हजार विद्यार्थीहरू लाभान्वित भएका थिए । सो सहयोगले सीमा क्षेत्रका युवाहरूलाई खेलकुदमा भाग लिने अवसर प्रदान गर्ने र शारीरिक शिक्षाको लोकप्रियता र विकासलाई बढावा दिने उद्देश्य राखेको थियो । खेलकुद किट वितरणको अतिरिक्त, फाउन्डेसनले स्कूलहरूमा फुटबल मैत्रीपूर्ण खेल, बास्केटबल कौशल चुनौती, जम्प रोप प्रतियोगिता, र टिम–बिल्डिङ खेलहरू सहितका विभिन्न खेल प्रतियोगिता र आदानप्रदान गतिविधिहरू पनि आयोजना गरेको थियो ।
यस्तै नेपाल ओलम्पिक कमिटीद्वारा आयोजित लुम्बिनी अन्तर्राष्ट्रिय शान्ति महोत्सव म्याराथनमा चाइना फाउन्डेसन फर रुरल डेभलपमेन्टले लुम्बिनीका सरकारी स्कूलका सहभागी विद्यार्थीहरूलाई अलीबाबा परोपकार र नेपाल ओलम्पिक समितिको लोगो अंकित झोलाहरू वितरण गरिएको थियो ।
सन् २०१९ मा चाइना फाउन्डेसन फर रुरल डेभलपमेन्ट र अलीबाबा परोपकारले संयुक्त रूपमा अन्तर्राष्ट्रिय पाण्डा प्याक परियोजना सुरु गरेका थिए । यसको उद्देश्य विकासशील देशहरूका अल्पविकसित क्षेत्रका प्राथमिक विद्यालयका विद्यार्थीहरूलाई सहयोग गर्नु रहेको छ । सन् २०२४ को अन्त्यसम्ममा यो परियोजनाले नेपालका ७० जिल्लामा रहेका दुईहजार भन्दा बढी सरकारी स्कूलहरूमा दुईलाख ७० हजार भन्दा बढी विद्यार्थीहरूलाई सहयोग गरेको छ ।
सन् २०२४ मा परियोजनालाई “खेलकुद किट“ को परिचय र सांस्कृतिक आदानप्रदान गतिविधिहरूको श्रृंंखला आयोजना गर्ने योजनासहित अपग्रेड गरिएको थियो । जसबाट चीन र परियोजना संचालित देशहरूबीचको मित्रतालाई थप मजबुत बनाउने लक्ष्य राखिएको छ ।
प्रतिक्रिया