एमालेको विधान महाधिवेशन : आज समूहगत छलफल, थापाको फरक मत प्रवेशको सम्भावना

काठमाडौं । नेकपा (एमाले)को दोस्रो राष्ट्रिय विधान महाधिवेशन शनिबार दोस्रो दिनमा प्रवेश गरेको छ । शुक्रबार उद्घाटन सत्र सम्पन्न भएपछि आज विभिन्न प्रतिवेदनमाथि समूहगत छलफल सुरु हुने भएको हो ।

एमालेका अनुसार आजको सत्रमा निर्वाचन आयोग, लेखा आयोग र अनुशासन आयोगका प्रतिवेदन प्रस्तुत गरिनेछन् । त्यसपछि प्रतिनिधिहरूले आ-आफ्ना समूहमा प्रतिवेदनमाथि छलफल गर्ने कार्यक्रम रहेको छ ।

यसअघि पहिलो दिन पार्टी अध्यक्ष तथा प्रधानमन्त्री केपी शर्मा ओलीले राजनीतिक प्रतिवेदन प्रस्तुत गरेका थिए । उक्त प्रतिवेदनमा विकसित राष्ट्रिय तथा अन्तर्राष्ट्रिय परिस्थितिको मूल्याङ्कन, पार्टीको कार्यदिशा र वर्तमानका चुनौतीबारे उल्लेख गरिएको छ । उपाध्यक्ष विष्णुप्रसाद पौडेलले विधान संशोधन प्रस्ताव, महासचिव शङ्कर पोखरेलले सांगठनिक प्रतिवेदन र सल्लाहकार परिषद्का अध्यक्ष अमृतकुमार बोहराले प्रतिवेदन प्रस्तुत गरेका थिए ।

महाधिवेशनमा स्थायी कमिटी सदस्य कर्णबहादुर थापाले दर्ता गराएको ३२ पृष्ठ लामो फरक मत प्रवेश पाउने सम्भावना रहेको छ । थापाले आफ्नो फरक मतमा पार्टी पूर्व उपाध्यक्ष तथा पूर्व राष्ट्रपति विद्यादेवी भण्डारीको सदस्यता लगायतका संवेदनशील विषय उठाएका छन् । फरक मत प्रवेश भएपछि महाधिवेशनमा थप बहस चर्किने अनुमान गरिएको छ ।

‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल, सुखी नेपाली हाम्रो गन्तव्य’ नाराका साथ सुरु भएको महाधिवेशनमा देशभरबाट २,०२६ जना प्रतिनिधि र ३१५ जना आयोजक गरी जम्मा २,३४१ जना सहभागी भएका छन् । महाधिवेशनले विधान संशोधनमार्फत आगामी कार्यदिशा तय गर्नेछ ।