काठमाडौं । राजधानीको माइतीघर मण्डलामा जेनजी पुस्ताले विरोध प्रदर्शन सुरु गरेका छन्।
सरकारले भदौ १९ गतेदेखि २६ वटा सामाजिक सञ्जाल नेपालमा निष्क्रिय गर्ने निर्णय गरेपछि सामाजिक सञ्जालमै सक्रिय जेनजी पुस्ता विरोध प्रदर्शनमा उत्रिएको हो । उनीहरुले भ्रष्टाचार, नातावाद, कृपावाद र युवाको पलायनलगायत कारणप्रति तिब्र असन्तोष प्रकट गरेका छन् ।
सोमबार बिहानैदेखि माइतीघर मण्डलामा भेला भएका हुन्। कलेजको ड्रेस, किताब र स्कुल पोशाकमै आएका युवाहरुले विभिन्न नारा अंकित प्लेकार्ड बोकेर प्रदर्शन गरिरहेका छन्।
‘जेनजी पुस्ता चिच्याउँछ, भ्रष्टहरुलाई गिज्याउँछ’, ‘स्वतन्त्र आवाज हाम्रो अधिकार’, ‘स्टप करप्सन’, ‘कता हिँडेको ट्याक्स लुटेर रु’ जस्ता नारा प्रदर्शनस्थलमा गुन्जिएका छन्।
१९९७ देखि २०१२ सम्म जन्मेका युवालाई ‘जेनजी’ पुस्ता भनिन्छ। डिजिटल नेटिभ्स मानिने यही पुस्ता सामाजिक सञ्जाल बन्दको निर्णयबाट सबैभन्दा बढी प्रभावित भएको छ।
औपचारिक विरोध कार्यक्रम बिहान ११ बजे सुरु गर्ने तय भए पनि युवाहरु बिहान ९ बजेदेखि नै उपस्थित भएर प्रदर्शन गरिरहेका छन्।
प्रतिक्रिया