काठमाडौं । डा. बाबुराम भट्टराई, जनार्दन शर्मा र सन्तोष परियारसहितका नेताहरूले आज नयाँ राजनीतिक दल घोषणा गर्ने भएका छन् । भट्टराई संरक्षक रहेको नेपाल समाजवादी (नयाँ शक्ति) पार्टी, माओवादी केन्द्र छोडेका जनार्दन शर्माको ‘प्रगतिशील अभियान’ र राष्ट्रिय स्वतन्त्र पार्टी (रास्वपा) परित्याग गरेका सन्तोष परियार समूह एकीकृत भएर ‘प्रगतिशील लोकतान्त्रिक पार्टी’ गठन गर्न लागेका हुन् ।
नेताहरूका अनुसार नयाँ दलमा पाँच सदस्यसम्मको अध्यक्ष परिषद रहनेछ भने डा. भट्टराई संरक्षकका रूपमा रहने सहमति बनेको छ । महाधिवेशनसम्मका लागि करिब पाँचदेखि छ जनाको अध्यक्षमण्डल रहने तयारी गरिएको छ। त्यससँगै करिब १५१ सदस्यीय केन्द्रीय समिति बनाउने तयारी पनि चलिरहेको छ ।
नयाँ दल आगामी निर्वाचनका लागि पहिले नै दर्ता भइसकेको बताइएको छ । चिन्हका रूपमा नेपाल समाजवादी पार्टीले प्रयोग गर्दै आएको ‘आँखा’ नै रहनेछ भने आधिकारिक झण्डा भने छिनोफानो हुने बाँकी छ ।
एकता घोषणाअघि तीनै पक्षले आ–आफ्ना आन्तरिक बैठक तथा भेला गरेका छन् । भट्टराई समूहले तीनकुनेमा, शर्मा समूहले त्रिपुरेश्वरमा र परियार समूहले छुट्टाछुट्टै छलफल सम्पन्न गरेका छन् ।
‘बृहत् एकता घोषणा सभा’ नामक कार्यक्रम आज बिहान ११ बजे राष्ट्रिय सभा गृहमा हुने तय गरिएको छ ।
प्रतिक्रिया