काठमाडौं । नेकपा एमालेको ११ औँ राष्ट्रिय महाधिवेशन अन्तर्गत नयाँ नेतृत्व चयनका लागि भएको निर्वाचनको मतदान सम्पन्न भएपछि मतगणनाको प्रक्रिया सुरु गरिएको छ । निर्वाचन आयोगले बिहान ८ बजेदेखि मतगणना सुरु गरी साढे १० बजेसम्म नतिजा सार्वजनिक गर्ने तयारी गरेको छ ।
एमाले केन्द्रीय निर्वाचन आयोगका प्रवक्ता भरत पोखरेलका अनुसार कानुनी प्रक्रिया पूरा गर्न केही समय लागे पनि निर्धारित समयमै परिणाम सार्वजनिक गर्ने लक्ष्य राखिएको छ । “कानुनी प्रक्रियाको पूर्णताका लागि केही समय लाग्न सक्छ, तर हाम्रो लक्ष्य साढे १० बजेसम्म नतिजा सार्वजनिक गर्ने नै हो,” उनले बताए ।
निर्वाचन आयोगका अनुसार मतगणनामा करिब ३ देखि ४ घण्टा समय लाग्ने अनुमान गरिएको छ । निर्वाचनमा कुल २ हजार २ सय ६३ मतदाता रहेकामा २ हजार २ सय २७ मत खसेको छ भने ३६ जना विभिन्न कारणले मतदानमा सहभागी हुन सकेनन् ।
अध्यक्ष पदमा वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिस्पर्धा रहेको छ । यस्तै, पार्टीको शक्तिशाली पद मानिने महासचिवका लागि शंकर पोखरेल र सुरेन्द्रप्रसाद पाण्डेबीच प्रतिष्पर्धा भइरहेको छ । मतगणनासँगै एमालेको नयाँ नेतृत्वको टुंगो लाग्ने अपेक्षा गरिएको छ ।
प्रतिक्रिया