काठमाडौं । काठमाडौं महानगरपालिकाका तत्कालीन प्रमुख प्रशासकीय अधिकृत प्रदीप परियारसहित सात जनाले भ्रष्टाचार मुद्दामा सफाइ पाएका छन्। सफाइ पाउने अन्यमा काठमाडौं महानगरपालिकाका निर्देशकहरू रवीनमान श्रेष्ठ, शिवराज अधिकारी, वसन्त आचार्य, नमराज ढकाल, सहायक निर्देशक उत्तम दाहाल तथा इञ्जिनियर जर्नादन गिरी रहेका छन् ।
ढल निर्माणमा अनियमितताको आरोप लागेका परियारसहितकाहरुलाई विशेष अदालतका न्यायाधीश नारायणप्रसाद पौडेल, हेमन्त रावल र उमेश कोइरालाको संयुक्त इजलासले मंगलबार सफाई दिएको हो । अदालतले अभियोग दाबी पुष्टि हुन नसकेको ठहर गर्दै सबै प्रतिवादीहरूलाई आरोपबाट सफाइ दिएको जनाएको छ।
सामाखुसी कोरिडोरअन्तर्गत बसुन्धरादेखि म्हेँपीसम्मको ढल निर्माण कार्यको ठेक्कामा अनियमितता भएको आरोपमा अख्तियार दुरुपयोग अनुसन्धान आयोगले उनीहरुविरुद्ध विशेष अदालतमा मुद्दा दायर गरेको थियो।
सहसचिव परियार भ्रष्टाचार मुद्दा दर्ता हुँदा सूचना तथा प्रसारण विभागका महानिर्देशकको जिम्मेवारीमा थिए।
प्रतिक्रिया