सुनचाँदीको मूल्यमा फेरि नयाँ रेकर्ड, किन भैरहेको छ दैनिक वृद्धि ?

काठमाडौं । पछिल्ला केही दिनदेखि लगातार उकालेको रेकर्ड बनाउँदै आएको सुनचाँदीको मूल्य बुधबार पनि उकालो लागेर नयाँ उच्च विन्दुमा पुगेको छ।

नेपाल सुनचाँदी व्यवसायी महासंघका अनुसार बुधबार सुनको मूल्य प्रतितोला १ हजार ५ सय रुपैयाँले वृद्धि हुँदै २ लाख ७८ हजार रुपैयाँमा निर्धारण गरिएको छ। अघिल्लो दिन सुन प्रतितोला २ लाख ७६ हजार ५ सय रुपैयाँमा कारोबार भएको थियो।

त्यस्तै चाँदीको मूल्य पनि उल्लेख्य दरले बढेको छ। एकैदिन प्रतितोला ३१५ रुपैयाँले वृद्धि भई बुधबारको मूल्य ५ हजार ६५५ रुपैयाँ पुगेको छ। अघिल्लो दिन चाँदी प्रतितोला ५ हजार ३४० रुपैयाँमा कारोबार भएको थियो। निरन्तरको मूल्यवृद्धिले सुनचाँदी बजार नयाँ रेकर्डतर्फ धकेलिएर गएको छ।

हाल सुनचाँदीको मूल्य वृद्धि पछाडि केही प्रमुख कारणहरू रहेका छन्। विश्व बजारमै सुनलाई ‘सुरक्षित लगानी’ का रूपमा हेरिने भएकाले राजनीतिक अनिश्चितता, अन्तर्राष्ट्रिय तनाव, युद्ध जोखिम र आर्थिक अस्थिरता बढ्दा सुनतर्फ आकर्षण बढ्छ र मूल्य उकालो लाग्ने गर्छ। त्यस्तै अमेरिकी डलरको उतार–चढाव, ब्याजदरसम्बन्धी अनुमान, केन्द्रीय बैंकहरूको सुन खरिद, तथा महँगाइ बारेको चिन्ताले पनि सुनको माग बढाइरहेको देखिन्छ।

चाँदीको हकमा पनि आभूषणसँगै उद्योग र प्रविधि क्षेत्रमा बढ्दो प्रयोगले माग उच्च बनाएको छ। यी वैश्विक कारणहरू मात्रै नभई भित्री बजारमा आयात लागत, विनिमय दर, र व्यवसायीहरूको मनोविज्ञानले पनि दैनिक रूपमा मूल्य समायोजन भई वृद्धि भइरहेको हो।