काठमाडौं । काठमाडौंमा जारी आईसीसी महिला टी-२० विश्वकप ग्लोबल छनोट अन्तर्गत आफ्नो दोस्रो खेलमा नेपालले आज नेदरल्यान्ड्ससँग प्रतिस्पर्धा गर्दैछ । समूह ‘बी’ अन्तर्गतको यो खेल बिहान ९ बजेदेखि कीर्तिपुरस्थित त्रिवि क्रिकेट मैदानमा सुरु हुनेछ ।
नेपालका लागि यो खेल अत्यन्तै महत्वपूर्ण रहेको छ । पहिलो खेलमा नेपाल थाइल्यान्डसँग ८ विकेटले पराजित भएको थियो । त्यसैले प्रतियोगितामा अगाडि बढ्ने सम्भावना कायम राख्न नेपाललाई नेदरल्यान्ड्सविरुद्ध जित आवश्यक छ । यता, नेदरल्यान्ड्स भने उत्कृष्ट लयमा देखिएको छ । उसले पहिलो दुई खेलमा जिम्बाबे र स्कटल्यान्डलाई पराजित गर्दै लगातार दुई जित निकालेको छ ।
महिला टी-२० अन्तर्राष्ट्रिय वरियतामा नेदरल्यान्ड्स १४ औं स्थानमा रहेको छ भने नेपाल २१औं स्थानमा छ । अहिलेसम्म दुवै टोलीबीच खेलेका तीनवटै खेलमा नेपालले पराजय बेहोरेको तथ्यांक छ, जसका कारण आजको खेल नेपालका लागि चुनौतीपूर्ण रहने देखिन्छ ।
घरेलु मैदान र समर्थकको साथलाई सदुपयोग गर्दै इतिहास बदल्ने लक्ष्यसहित नेपाली महिला टोली मैदानमा उत्रनेछ । टोलीको नेतृत्व इन्दु बर्मा, पूजा महतो, रुबिना क्षेत्री, बिन्दु रावलजस्ता अनुभवी खेलाडीहरूले गर्ने अपेक्षा गरिएको छ ।
नेपालको टोलीमा इन्दु बर्मा, पूजा महतो, सम्झना खड्का, बिन्दु रावल, रुबिना क्षेत्री, कविता कुँवर, रिया शर्मा, सोमु विष्ट, सीता राना मगर, काजल श्रेष्ठ, कविता जोशी, रोमा थापा, मनीषा उपाध्याय, रचना चौधरी र राजमती ऐरी रहेका छन् ।
नेपालले नेदरल्यान्ड्सविरुद्ध जित निकाल्दै प्रतियोगितामा नयाँ इतिहास रच्ने लक्ष्यसहित मैदानमा उत्रनेछ ।
प्रतिक्रिया