काठमाडौं । नेपाली कांग्रेसको केन्द्रीय कार्यसमितिको बैठक आज बस्दैछ । बैठक दिउँसो १ बजे पार्टीको केन्द्रीय कार्यालय सानेपामा हुने तय भएको छ ।
आजको बैठकमा पार्टीको १५ औँ महाधिवेशन आह्वान गर्ने विषयलगायत महत्वपूर्ण एजेण्डामाथि छलफल हुने जनाइएको छ । कांग्रेसले आगामी भदौ २४ गते संस्थापक नेता बीपी कोइराला को जन्मजयन्तीको अवसर पारेर महाधिवेशन उद्घाटन गर्ने तयारी गरेको बुझिएको छ ।
यसअघि गत शुक्रबार र आइतबार पनि केन्द्रीय समिति बैठक बसेको थियो । ती बैठकहरूले फागुन २१ गते सम्पन्न प्रतिनिधिसभा सदस्य निर्वाचनमा भएको पराजयको समीक्षा गर्नुका साथै पार्टी सभापति गगन कुमार थापाले दिएको राजीनामा अस्वीकार गर्ने निर्णय गरेका थिए ।
केन्द्रीय समितिले सर्वसम्मत रूपमा सभापति थापाको राजीनामा अस्वीकृत गरेपछि उनी आजको बैठकमा सहभागी हुने नेताहरूले बताएका छन् ।
यसअघि बसेका बैठकहरू उपसभापति विश्वप्रकाश शर्माले सञ्चालन गरेका थिए ।
प्रतिक्रिया