काठमाडौं । नवनियुक्त प्रधानमन्त्री बालेन्द्र शाहलाई भारतीय समकक्षी नरेन्द्र मोदीले बधाई दिएका छन्। सामाजिक सञ्जाल एक्समार्फत सन्देश जारी गर्दै मोदीले शाहले प्रधानमन्त्री पद तथा गोपनीयताको शपथ ग्रहण गरेको अवसरमा शुभकामना व्यक्त गरेका हुन्।
मोदीले शाहको नियुक्तिले नेपाली जनताले नेतृत्वप्रति राखेको विश्वासलाई प्रतिबिम्बित गर्ने उल्लेख गरेका छन्। उनले नेपाल र भारतबीचको ऐतिहासिक मित्रता र सहकार्यलाई अझ सुदृढ बनाउँदै दुवै देशका जनताको हितका लागि मिलेर काम गर्न आफू तत्पर रहेको पनि बताएका छन्।
सन्देशमा मोदीले भनेका छन्, “नेपालको प्रधानमन्त्रीको रूपमा शपथग्रहण गर्नुभएकोमा श्री बालेन्द्र शाहज्यूलाई हार्दिक बधाई। यहाँको नियुक्तिले नेपाली जनताले यहाँको नेतृत्वप्रति राखेको विश्वासलाई प्रतिबिम्बित गर्दछ। हाम्रा दुई देशका जनताको साझा हितका लागि भारत–नेपाल मित्रता र सहकार्यलाई अझ उचाइमा पुर्याउन म यहाँसँग मिलेर काम गर्न तत्पर छु।”
प्रतिक्रिया