तिनाउ खोलामा डुबेर आज पनि एक जनाको ज्यान गयो, मृत्यु हुनेमा गोरखपुरका ३४ वर्षीय विपिन दुसिया

बुटवल । पाल्पाको तिनाउ खोलामा डुबेर आज पनि एक जनाको मृत्यु भएको छ । सोमबार दिउँसो पाल्पाको तिनाउ गाउपालिका वडा नम्बर ३ स्थित सिद्धबाबा मन्दिर नजिकै रहेको तिनाउ खोलामा पौडी खेल्ने क्रममा भारतको गोरखपुरका ३४ वर्षीय विपिन दुसियाको मृत्यु भएको हो ।

प्रहरी चौकी दोभान पाल्पाले जानकारी दिएको जानकारी अनुसार दुसिया गोरखपुरमा मेडिकल सचालन गर्दै आएका थिए । घटनाको जानकारी पाएसँगै उद्धारमा पुगेको प्रहरीको टोलीले थप अनुसन्धान जारी रहेको जनाएको छ ।

पछिल्लो समय तिनाउ गाउँपालिकाको वडा नम्बर ३ मा अवस्थित भुत खोला, विद्युत ड्याम साइड तथा वडा नम्बर २ को खुर्साने लगायतका स्थानमा डुबेर मृत्यु हुनेको सङ्ख्या बढेको छ ।

पछिल्लो एक वर्षको अवधिमा तिनाउ गाउँपालिकामा घुम्न आउने विभिन्न जिल्ला तथा भारतीय नागरिक गरी ९ जनाले पानीमा डुबेर ज्यान गुमाएका छन् । ज्यान गुमाउनेमा १ महिला, २ बालबालिका र अन्य पुरुष रहेको प्रहरीले जनाएको छ ।