रुपन्देहीमा पनि सुरु भयो लघुवित्त विरोधी आन्दोलन

भैरहवा । रुपन्देहीमा पनि लघुवित्त विरोधी आन्दोलन चर्कन थालेको छ । लघु वित्तीय संस्थाले ज्यादती गरेको भन्दै लघुवित्तपीडितहरुले रुपन्देहीको भैरहवामा विरोध प्रदर्शन गरेका छन् । लघुवित्तीय संस्थाविरुद्धको संघर्ष समिति नेपालको आयोजनामा पीडितहरुले भैरहवामा प्रदर्शन गरेका हुन् ।

प्लेकार्ड सहित विरोध प्रदर्शनमा निसकेका पीडितहरुले लघु वित्तीय संस्था खारेज गर, लघुवित्तीय संस्थाहरु द्वारा लगाइएको सामुहिक ऋण मिनाहा गर, गरिब किसानहरुलाई नि शुल्क ऋण प्रदान गर, ऋणी मार्न पाइँदैन लगायतका नारा सहित प्रदर्शन गर्दै नेपाल राष्ट्र बैंकको लुम्बिनी प्रदेश कार्यालय अगाडी पुगेर विरोधसभा गरेका थिए ।

विरोधसभामा बोल्दै संघर्ष समितिका केन्द्रिय अध्यक्ष मनिराम ज्ञवाली, लुम्बिनी प्रदेश अध्यक्ष बद्री देवान, गगन विश्वकर्मा, सिखा रेग्मी, अब्दुल शाह, कोशी इन्चार्ज,रमेश सुनार, प्रदेश इन्चार्ज रोमन थापा लुम्बिनी प्रदेशका १२ वटै जिल्लाका अध्यक्ष लगायतले लघुवित्तको कारणले परिवार उजाडिन पुगेको, शोषणमा परि आत्महत्या तथा ज्यान गुमाएको, ऋण तिर्दा समेत बैंकहरुले कालोसूचिमा राखेको बताएका थिए।

लघु वित्तीय संस्थाहरुले राष्ट्र बैंकको नियम नमानेर ऋण प्रवाह गरेर सास्ती दिएको, ऋणीको क्षमता नबुझी कर्जा प्रवाह गरेर अहिले दुःख दिइरहेको र ऋणीलाई बिचल्ली समेत बनाएको पिडितहरुले गुनासो गरे ।