राष्ट्रिय वाणिज्य बैंकको सञ्चालक समितिको सदस्यमा प्रा डा उपेन्द्र कोइराला नियुक्त

काठमाडौं । नेपाल सरकारको स्वामित्व रहेको राष्ट्रिय वाणिज्य बैंकको सञ्चालक समितिको सदस्यमा प्राडा उपेन्द्र कोइराला नियुक्त भएका छन् । अर्थमन्त्री डा। युवराज खतिवडाले प्राडा उपेन्द्र कोइरालालाई बैंकको सञ्चालक समितिको सदस्यमा नियुक्त गरेका हुन् ।

अर्थमन्त्रालयबाट नियुक्तिको पत्र राष्ट्रिय वाणिज्य बैंकको सञ्चालक समितिमा पुगेको छ। बैंकले बुधबार संचालक समितिको बैठक बोलाएको छ । बैठकले कोइरालाई अध्यक्षमा मनोनयन गर्नेछ ।

सरकारले निर्मलहरि अधिकारीलाई राजस्व बोर्डको सदस्यमा नियुक्त गरेपछि बैंकको अध्यक्ष पद खाली रहेको थियो । पदपूर्तिका लागि कोइरालालाई सञ्चालकका रूपमा नियुक्त गरेको अर्थमन्त्रालयले जनाएको छ ।

कोइराला यसअघि नेपाल आयल निगमको कार्यकारी निर्देशकसमेत भइसकेका छन्। उनी मध्यपश्चिमाञ्चल विश्वविद्यालयका पूर्व उपकुलपतिसमेत रहेका छन् ।