चोरी भएका २२ वटा मोटरसाइकल र स्कुटर सवारीधनीले पाए

काठमाडौं । चोरी भएका २२ वटा दुईपांग्रे मोटरसाइकल र स्कुटर सवारीधनीले पाएका छन् । काठमाडौं उपत्यकाका विभिन्न स्थान र मितिमा चोरी भएका मोटरसाइकलर स्कुटर खोजेर आइतबार काठमाडौं उपत्यका ट्राफिक प्रहरी कार्यालयले सम्बन्धित धनीलाई हस्तान्तरण गरेको हो ।

काठमाडौं उपत्यका ट्राफिक प्रहरी कार्यालयमा आयोजित एक कार्यक्रममा कार्यालय प्रमुख प्रहरी वरिष्ठ उपरीक्षक नवराज अधिकारीले १२ स्कुटर र १० मोटरसाइकल सम्बन्धित धनीलाई हस्तान्तरण गरे ।

काठमाडौं उपत्यका ट्राफिक प्रहरी कार्यालयमा प्राप्‍त निवेदनका आधारमा खोजी गर्ने क्रममा केही वास्तविक नम्बर प्लेटमा र केही नक्कली नम्बर प्लेट राखेको अवस्थामा ट्राफिक प्रहरीले ती सवारीसाधनलाई फेला पारेको थियो ।

ट्राफिक प्रहरीका अनुसार, गत वर्ष साउनदेखि आजसम्म ४६७ वटा सवारीसाधन खोजेर ट्राफिक प्रहरीले सम्बन्धित धनीलाई जिम्मा लगाएको छ । चोरीका ४४ वटा दुईपांग्रे सवारीसाधनसहित चोरीमा संलग्न ६६ जनालाई आवश्यक कारबाहीका लागि विभिन्न प्रहरी परिसर तथा प्रहरी वृत्तमा पठाइएको छ ।

ट्राफिक प्रहरीले आर्थिक वर्ष २०७९/०८० मा ४९९ वटा, ०८०/०८१ मा ४१७ र ०८१/०८२ को आज सम्ममा ४६७ वटा दुईपांग्रे सवारीसाधन खोजतलास गरी ट्राफिक प्रहरीले सम्बन्धित धनीलाई जिम्मा लगाएको छ ।