काठमाडौं । आईसीसी टी-२० विश्वकप छनोट प्रतियोगिताको तयारीका क्रममा नेपालले पहिलो वार्मअप म्याचमा ओमानलाई ६ विकेटले पराजित गरेको छ । शनिबार सम्पन्न खेलमा ओमानले प्रस्तुत गरेको १ सय ११ रनको लक्ष्य नेपालले १७ ओभरमा चार विकेट गुमाउँदै पूरा गरेको हो ।
नेपालका ओपनर आसिफ शेखले ६१ रनको शानदार अर्धशतक प्रहार गर्दै जितको आधार तयार पारे । कप्तान रोहित पौडेलले २५ रन जोडे भने कुशल भुर्तेलले ११ र कुशल मल्लले १० रनको योगदान गरे ।
यसअघि टस जितेर ब्याटिङ गरेको ओमानले २० ओभर पूरा खेल्दै ९ विकेटको क्षतिमा १ सय १० रन मात्र जोड्न सकेको थियो ।
नेपालका बलरमध्ये सोमपाल कामी, सन्दीप लामिछाने र दीपेन्द्र सिंह ऐरीले दुई-दुई विकेट हात पारे ।
विश्वकप छनोट खेल्नका लागि नेपाल ओमान पुगेको हो । वार्मअप म्याचपछि नेपालले समूह चरणमा कुवेत र जापानसँग प्रतिस्पर्धा गर्नेछ। समूह चरणको शीर्ष स्थानमा पुग्ने टिम सुपर सिक्समा छनोट हुनेछ ।
सुपर सिक्सको शीर्ष तीन टिमले अर्को वर्ष हुने टी-२० विश्वकपमा स्थान सुरक्षित गर्नेछन् ।
प्रतिक्रिया