काठमाडौं । सुदूरपश्चिमको पूर्वाधार अवस्थाको निरीक्षण तथा जनताका समस्या बुझ्न भ्रमणमा रहेका पूर्वाधार विकासमन्त्री सुनिल लम्साल बिरामी भएपछि सेनाको स्काई ट्रकबाट धनगढी काठमाडौं ल्याइएको छ ।
दार्चुलाबाट बैतडीको गोठालापानी पुगेपछि मन्त्री लम्सालको स्वास्थ्यमा समस्या देखिएको थियो। स्वास्थ्यमा समस्या आएपछि उनलाई नेपाली सेनाको हेलिकोप्टरमार्फत बैतडीबाट कैलालीको धनगढी ल्याइएको थियो । त्यसपछि धनगढीबाट नेपाली सेनाको स्काइट्रकमार्फत उनलाई काठमाडौं ल्याइएको हो।
मन्त्री लम्सालसहित भ्रमण टोलीका सदस्यहरूमा भाइरल ज्वरो र रुघाको संक्रमण देखिएको बताइएको छ। स्वास्थ्य अवस्था भने चिन्ताजनक नरहेको मन्त्रीको सचिवालयले जनाएको छ।
मन्त्री लम्साल शुक्रबारदेखि सुदूरपश्चिमका विभिन्न जिल्लाको भ्रमणमा थिए। उनले दार्चुला हुँदै बैतडी पुगेका थिए। शनिबार बेलुका उनी आफैँ गाडी चलाएर दार्चुलाबाट बैतडीको गोठालापानी पुगेका थिए।
बैतडी र बझाङका विभिन्न स्थानमा राजमार्ग तथा अन्य पूर्वाधारको अवस्था निरीक्षण गर्ने मन्त्रीको कार्यक्रम थियो। तर स्वास्थ्यमा समस्या आएपछि हिँडडुल गर्न सक्ने अवस्था नरहेकाले निर्धारित कार्यक्रमहरू प्रभावित भएका छन्।
प्रतिक्रिया