बेइजिङ । चीनको राजधानी बेइजिङमा दोस्रो विश्व मानवोइड रोबोट खेलकुद प्रतियोगिता शनिबारदेखि सुरु भएको छ। प्रतियोगितामा विभिन्न देश तथा संस्थाका ६६६ टोलीका २ हजार ५६ वटा मानवोइड रोबोटले खेलकुद, आपतकालीन उद्धार र रसदलगायत विधामा प्रतिस्पर्धा गरिरहेका छन्।
प्रतियोगिताको उद्घाटनसँगै मानवोइड रोबोटले १०० मिटर दौडमा प्रभावशाली प्रदर्शन गरेका छन्। एक रोबोटले १०० मिटर दूरी ९।३९ सेकेन्डमा पूरा गर्दै जमैकाका महान् धावक उसेन बोल्टले २००९ मा कायम गरेको ९।५८ सेकेन्डको विश्व कीर्तिमानभन्दा छिटो समय निकालेको दाबी गरिएको छ।
त्यस्तै, अर्को मानवोइड रोबोटले उच्च जम्पमा पनि उल्लेखनीय सुधार गरेको छ। गत वर्षको ९५।६४ सेन्टिमिटरको उत्कृष्ट प्रदर्शनलाई उछिन्दै यस वर्ष उक्त रोबोटले २।८८ मिटर उचाइ पार गरेको जनाइएको छ।
प्रतियोगिताको उद्घाटन समारोह प्रविधि र मनोरञ्जनको अनौठो संयोजनका रूपमा प्रस्तुत गरिएको थियो। दर्जनौँ मानवोइड रोबोटले मानव संगीतकर्मीसँगै अर्केस्ट्रामा प्रस्तुति दिएका थिए। हजारौँ रोबोटको सामूहिक प्रदर्शनले दर्शकलाई आकर्षित गरेको थियो। चिनियाँ सञ्चारमाध्यम चाइना डेलीका अनुसार उक्त प्रस्तुतिले चीनमा मानवोइड रोबोट प्रविधिको पछिल्लो विकास र क्षमतालाई प्रदर्शन गरेको थियो।
उद्घाटन समारोहमा रोबोट र चर्चित खेलाडीबीचको प्रतिस्पर्धा पनि आकर्षणको केन्द्र बन्यो। मानवोइड रोबोटहरूले टेनिस खेलाडी झेङ जी, ओलम्पिक टेबल टेनिस च्याम्पियन डिङ निङ र फुटबल खेलाडी याङ चेनलगायत खेलाडीसँग टेबल टेनिस खेलेका थिए। उनीहरूले बालबालिकासँग पनि विभिन्न गतिविधिमा सहकार्य गरेका थिए।
ओलम्पिक टर्च रिलेको स्वागतमा प्रतीकात्मक ज्वाला प्रज्वलन गर्ने रोबोटसमेत प्रदर्शन गरिएको थियो। उद्घाटन समारोहपछि मानवोइड रोबोटहरू १०० मिटर र ४०० मिटर दौडका प्रारम्भिक प्रतिस्पर्धामा सहभागी भएका थिए।
मानवोइड रोबोटलाई खेलकुदका माध्यमबाट परीक्षण र प्रदर्शन गर्ने यस्तो प्रतियोगिताले कृत्रिम बुद्धिमत्ता, रोबोटिक्स र स्वचालित प्रविधिको तीव्र विकासलाई समेत उजागर गरेको छ।
प्रतिक्रिया