काठमाडौं । बार्सिलोनाले स्पेनी ला लिगामा आफ्नो शतप्रतिशत सुरुआतलाई निरन्तरता दिँदै आइतबार भ्यालेन्सियालाई ५-० ले पराजित गरेको छ ।
लगातार चौथो जितसँगै बार्सिलोना चार खेलबाट शतप्रतिशत नतिजा निकाल्ने ला लिगाको एकमात्र टोली बनेको छ । सुरुदेखि नै आक्रामक खेल प्रस्तुत गरेको बार्सिलोनाले भ्यालेन्सियामाथि सहज जित निकाल्दै लिगमा आफ्नो प्रभाव कायमै राखेको हो ।
बार्सिलोनाका लागि लामिन यमलले दुवै हाफमा एक-एक गोल गरे । अघिल्लो खेलमा रायो भायेकानोलाई पराजित गर्दा पनि दुई गोल गरेका यमलले भ्यालेन्सियाविरुद्धको खेलमा पनि उत्कृष्ट प्रदर्शन गर्दै टोलीको जितमा महत्वपूर्ण भूमिका खेले ।
त्यस्तै फर्मिन लोपेज, राफिन्हा र पेद्रीले पनि बार्सिलोनाका लागि एक-एक गोल गरे । पाँच गोलको जितसँगै बार्सिलोनाले अंकतालिकामा आफ्नो बलियो उपस्थितिलाई निरन्तरता दिएको छ ।
म्यानचेस्टर सिटीबाट बार्सिलोनामा आबद्ध भएका मिडफिल्डर रोड्रीले पनि पहिलोपटक टोलीको सुरुआती ११ मा रहेर खेले । नयाँ अनुबन्धित फरवार्ड गाब्रियल जेसुसले भने दोस्रो हाफमा वैकल्पिक खेलाडीका रूपमा मैदान प्रवेश गर्दै बार्सिलोनाका लागि डेब्यु गरे ।
खेलका क्रममा रोड्रीसँग ठक्कर लाग्दा अनुहारमा चोट लागेपछि बार्सिलोनाका डिफेन्डर एरिक गार्सियालाई पहिलो हाफमै मैदानबाट बाहिर निकाल्नुपरेको थियो ।
यता, भ्यालेन्सियाका लागि भने यो लगातार तेस्रो हार हो । टोलीले चार खेलमा जम्मा एक गोल मात्रै गर्न सकेको छ । बार्सिलोनासँग ५-० को फराकिलो हार बेहोरेपछि भ्यालेन्सियाका आक्रोशित समर्थकहरूले क्लबका मालिक र खेलाडीविरुद्ध विरोध प्रदर्शनसमेत गरेका थिए ।
प्रतिक्रिया