काठमाडौं । प्रधानमन्त्री केपी शर्मा ओलीले तमु (गुरुङ) समुदायको नयाँ वर्ष तथा प्रमुख चाड तमु ल्होछारको अवसरमा शुभकामना व्यक्त गरेका छन ।
उनले आज एक शुभकामना सन्देश जारी गर्दै स्वदेश तथा विदेशमा रहेका तमु समुदायलगायत सबै नेपालीहरूमा सुस्वास्थ्य, सुख, शान्ति, समृद्धि एवं उत्तरोत्तर प्रगतिको शुभकामना व्यक्त गरेका छन ।
‘‘तमु समुदायको महान पर्व तमु ल्होछारको अवसरमा यस समुदायको रीति, परम्परा, संस्कृतिको संरक्षण र सम्वर्द्धन गर्दै अघि बढ्न यस पर्वले प्रेरणा दिनेछ भन्ने मेरो विश्वास छ,’’ प्रधानमन्त्री ओलीले सन्देशमा भनेका छन ।
नेपाल बहुजातीय, बहुभाषिक, बहुधार्मिक र बहुसांस्कृतिक विशेषतायुक्त मुलुक भएको उल्लेख गर्दै उनले यसलाई मौलिक पुँजीको रूपमा व्याख्या गरेका छन । प्रचलित भाषा, धर्म, संस्कृति, भेषभूषा लगायतका विविधतालाई समृद्ध नेपाल निर्माणमा सदुपयोग गर्नुपर्नेमा प्रधानमन्त्री ओलीले जोड दिएका छन ।
तमु ल्होछार पर्वले तमु समुदाय लगायत सम्पूर्ण नेपालीहरूको बीचमा हार्दिकता, सहिष्णुता र सम्मान कायम गर्दै राष्ट्रिय एकता प्रवर्द्धन गर्ने अपेक्षासमेत उनले व्यक्त गरेका छन ।
प्रतिक्रिया