बुटवल । बुटवल उपमहानगरपालिका वडा नम्बर-९ मिलनचोकस्थित तीनतले घरसहितको जग्गा आफूहरूको जानकारीबिना कम मूल्यमा लिलामी गरिएको भन्दै पीडित परिवारले लुम्बिनी विकास बैंकको देवीनगर शाखा अगाडि धर्ना दिएका छन् ।
लक्ष्मी विष्ट पौडेलको नाममा रहेको उक्त घरजग्गा बैंकले ५३ लाख रुपैयाँमा लिलामी बिक्री गरेको परिवारको दाबी छ । परिवारका अनुसार उक्त सम्पत्तिको वास्तविक मूल्य १ करोड २५ लाख रुपैयाँभन्दा बढी पर्छ ।
परिवारले बैंककै मूल्यांकनअनुसार उक्त सम्पत्तिको मूल्य ८१ लाख ९१ हजार रुपैयाँ कायम गरिएको दाबी गर्दै सो मूल्यभन्दा निकै कममा लिलामी गरिएको भन्दै आपत्ति जनाएको छ ।
ऋण चुक्ता गर्ने विषयमा बैंकसँग छलफल तथा समन्वय भइरहेको अवस्थामा आफूहरूलाई पर्याप्त जानकारी नदिई घरजग्गा लिलामी गरिएको लक्ष्मी विष्ट पौडेलको गुनासो छ । आफ्नो नाममा रहेको करोडभन्दा बढी मूल्य पर्ने सम्पत्ति कम मूल्यमा लिलामी गरिएको भन्दै उनले लिलामी प्रक्रिया, सम्पत्तिको मूल्यांकन र बैंकको भूमिकामाथि प्रश्न उठाएकी छन् ।
लिलामी प्रक्रिया पुनरावलोकन गर्नुपर्ने माग गर्दै पीडित परिवारले बुटवल–११ देवीनगरस्थित लुम्बिनी विकास बैंकको शाखा कार्यालय अगाडि धर्ना दिएका हुन् ।
परिवारले आफूहरूलाई पर्याप्त जानकारी नदिई तथा सम्पत्तिको मूल्यांकनभन्दा कम मूल्यमा लिलामी गरिएको विषयमा बैंकले स्पष्ट जवाफ दिनुपर्ने माग गरेको छ । लिलामी प्रक्रिया पुनरावलोकन गरी आफूहरूको सम्पत्तिको उचित मूल्य कायम गर्नुपर्ने उनीहरूको माग छ ।
प्रतिक्रिया