कस्तुरीको बिणा सहित ५ जना बाँके प्रहरीको नियन्त्रणमा

नेपालगन्ज । बाँके प्रहरीले कस्तुरीको बिणा र जङ्गली जनावरको दाँत सहित पाँच जनालाई पक्राउ गरेको छ । प्रहरीले बिहिबार नेपालगन्ज उपमहानगरपालिका १ मा रहेको लौटन थारुको घरबाट कस्तुरीको बिणा र जङ्गली जनावरको दाँत सहित ५ जनालाई पक्राउ गरेको हो ।

बन्यजन्तुको अबैध रुपमा खरिद बिक्रि भई रहेको भन्ने सूचनाको आधारमा स्थानीय लौटन थारुको घर तलासी गर्दा पार्वती थापाको रातो लेडिज ब्याग भित्र खैरो रङ सहितको कस्तुरिको बिणा र जंगलि जनावरको दाँत फेला परेको प्रहरीले जनाएको छ ।

प्रहरीले बर्दिया ठाकुरबाबा स्थायी घर भई नेपालगन्जमा बसोबास गर्दै आएका ५२ वर्षिय लौटन थारु, सोही ठाँउका २६ वर्षिय कमल परियार, बढैयातालका २५ वर्षिय पार्वती थापा, सोही ठाँउका ४५ वर्षिय रामशरण थारु र जाजरकोटका २७ वर्षिय धनराज थापालाई पक्राउ गरीएको प्रहरीले जनाएको छ ।

पक्राउ परेका ब्यक्ति तथा बरामद गरीएको सामग्रीलाई आवश्यक कारबाहीका लागी जिल्ला वन कार्यालय नेपालगंजमा पठाईएको जिल्ला प्रहरी कार्यालय बाँकेले जनाएको छ ।