गण्डकी प्रदेशका ३ सांसदलाई कोरोना पुष्टि, तर अविश्वासको प्रस्तावमा मतदान गर्न पाउने

पोखरा । गण्डकी प्रदेशका तीन जना सांसदलाई कोरोना पुष्टि भएको छ । प्रदेशसभाका ६० जना सदस्यहरुको बुधबार लिइएको पीसीआर परीक्षणमा तीन जनालाई कोरोना पुष्टि भएको हो । संक्रमित हुनेहरुमा एमालेका राजीव पहारी र प्रभा कोइराला र कांग्रेसका मनकुमारी गुरुङ रहेका छन् ।

सत्तारुढ एमालेले बुधबार सांसदहरुको पीसीआर परीक्षण नभएसम्म सदन अघि बढाउन नदिने भन्दै उठेर अवरुद्ध गरेपछि सबै सांसदहरुको पीसीआर परीक्षण भएको थियो । यस्तै एक जना कर्मचारीलाई पनि कोरोना लागेको छ ।

प्रदेशसभामा मुख्यमन्त्री पृथ्वीसुब्बा गुरुङ विरुद्ध अविश्वासको प्रस्तावमाथि छलफल भैरहेकोछ । हिजो अवरुद्ध भएको बैठक आज दिउँसो १ बजे पुनः बस्दैछ । आजै मुख्यमन्त्रीले जवाफ दिएपछि अविश्वासको प्रस्तावमाथि मतदान हुनेछ । कोरोना लागेका सांसदहरुले पनि मतदान गर्न पाउनेछन् । तर, उनीहरुले मतदानअघिको छलफलमा भने भाग लिन पाउनेछैनन् ।