महन्थ ठाकुरको नयाँ पार्टी – जसपा नेपाल लोकतान्त्रिक

काठमाडौं । जनता समाजवादी पार्टीको आधिकारिकता टुंगो लागसँगै दलविहीन अवस्थामा पुगेको महन्थ ठाकुर समूहले नयाँ पार्टी गठन गर्ने भएको छ ।

राष्ट्रपतिले राजनीतिक दल विभाजनसम्बन्धी अध्यादेश जारी गरेलगत्तै यो समुहले आफ्नो नयाँ पार्टी गठन गर्ने तयारी गरेको हो । ठाकुर पक्षको बुधरबार बसेको बैठकले पार्टीको नाम टुंगो लगाएको छ । नयाँ पार्टीको नाम अब ‘जसपा नेपाल लोकतान्त्रिक’ रहने भएको छ ।

पार्टीको नाममा टुंगो लागेपनि पदाधिकारी र केन्द्रीय कमिटीको संख्याबारे भने टुंगो नलागेको सो समुहका नेता शरतसिंह भण्डारीले बताएका छन् ।

निर्वाचन आयोगले गत साउन ११ गते जसपाको आधिकारिकता टुंगो लगाइदिएपछि ठाकुर पक्ष दलविहीन अवस्थामा पुगेको थियो । जसपाको कार्यकारिणीलाई आयोगले अद्यावधिक गरेपछि ठाकुर सो पार्टीको साधारण सदस्य मात्र बन्न पुगेका थिए । अब राजनीतिक दल विभाजनसम्बन्धी अध्यादेश जारी भएसँगै ठाकुर पक्षले राहतको महशुस गरेको छ ।