काठमाडौं । मन्त्रीपरिषदको बैठकमा नै प्रधानमन्त्रीले लकडाउन कार्यान्वयनमाथि ब्यङ्ग गरेपछि गृह मन्त्रालयले एक जिल्लाबाट अर्को जिल्ला समेत जान नपाउने गरि लकडाउनलाई कडा बनाएको छ । मन्त्रालयले यस अघि एक जिल्लबाट अर्को जिल्लामा जाने गरी जारी गरेका सबै सवारी पास रद्द गरेको छ ।
मुलुकमा कोरोना [कोभिड–१९] भाइरस संक्रमितको संख्या दिनप्रतिदिन बढ्दै गएपछि गृहले यस्तो निर्णय गरेको हो । मंगलबार मात्रै ५७ जना कोरोना संक्रमित भेटिएपछि लकडाउन कार्यान्वयनमा कडाइ गरिएको हो ।
‘बिहीबारदेखि लागू हुने गरी जिल्ला क्रस गर्न नपाउने नियम लागु हुने गृह मन्त्रालयका उप–सचिव उमाकान्त अधिकारीले जानकारी दिनुभयो । अधिकारीका अनुसार उपत्यकामा कार्यरत सरकारी कर्मचारीको हकमा पनि पासलाई अनिवार्य गरिएको छ ।
यसअघि सरकारी कर्मचारी, बैंक तथा वित्तीय संस्था, उद्योग, निर्माण सेवालगायतसँग सम्बद्ध व्यक्तिले कार्यालयको परिचय पत्र देखाएर हिँड्न पाउने ब्यवस्था थियो । अब सम्बन्धित निकायबाट प्राप्त पास अनिवार्य गरिएको अधिकारीको भनाइ छ ।
मन्त्री परिषदको बैठकमा प्रधानमन्त्रीले मुलुकमा लकडाउन नै नभएको भन्दै अहिले कार्यान्वयन भईरहेको लकडाउनलाई लकडाउन भन्न नसकिने कडा प्रतिक्रिया ब्यक्त गर्नुभएको थियो ।
सञ्चारकर्मीको हकमा भने सूचना विभागको परिचयपत्रका आधारमा आवतजावत गर्न दिइने गृहले जनाएको छ ।
प्रतिक्रिया